नितेश गट्टीवार (गडचिरोली)दि.२८फेब्रुवारी: देवाभाऊंच्या लाडक्या बहिणींनी दि. 23 फेब्रुवारी पासून विविध रास्त मागण्यांसाठी गडचिरोली जिल्हाधिकारी कार्यालया समोर आमरण उपोषण सुरू केले आहे. स्थानिक प्रशासन व संबंधितांवर गंभीर आरोप करत न्याय मिळावा, या मागणीसाठी हे आंदोलन छेडण्यात आले आहे. या उपोषण मंडपास माजी आमदार तथा आदिवासी मोर्चा चे प्रदेशाध्यक्ष डॉ. देवराव होळी यांनी देवा भाऊ यांच्या लाडक्या बहिणीने सुरू केलेल्या आमरण उपोषणाला भेट देत उपोषणकर्त्यांशी सविस्तर चर्चा केली.
यावेळी त्यांनी उपोषणकर्त्यांच्या मागण्यांचा आढावा घेत संबंधित प्रश्नांवर नियमानुसार व कायदेशीर मार्गाने लढा देण्याची तयारी दर्शविली.उपोषण मंडपात भेटीदरम्यान डॉ. होळी यांनी आंदोलकांचे म्हणणे शांतपणे ऐकून घेतले. संबंधित प्रकरणात अन्याय होत असल्याचा आरोप करत त्यांनी प्रशासनाच्या भूमिकेवर तीव्र नाराजी व्यक्त केली. “कोणाच्याही दबावाला बळी न पडता न्यायासाठी संघर्ष करू. मागण्या रास्त असतील तर त्या मान्य झाल्याशिवाय आम्ही स्वस्थ बसणार नाही,” असा इशारा त्यांनी दिला.तसेच, आंदोलन संविधानिक चौकटीत राहून आणि कायदेशीर प्रक्रियेद्वारे पुढे नेले जाईल, असे स्पष्ट करत त्यांनी उपोषणकर्त्यांना धीर दिला.
अन्याय करणाऱ्यांविरोधात तीव्र आंदोलन उभारण्याचा इशाराही त्यांनी यावेळी दिला.डॉ. होळी यांच्या भेटीमुळे उपोषणकर्त्यांमध्ये नवचैतन्य निर्माण झाले असून पुढील लढा अधिक तीव्र करण्याचा निर्धार व्यक्त करण्यात आला.
उपोषणकर्त्यांच्या प्रमुख मागण्या
अगरबत्ती प्रकल्पाच्या नावाखाली चामोर्शी येथील गरीब शेतकरी व शेतमजूर महिलांना बँकेशी संलग्न करून त्यांच्या नावाने कर्ज उचलून फसवणूक केल्याचा आरोप असलेल्या नगरसेवक आशिष अरुण पिपरे व नगरसेविका सोनाली आशिष पिपरे यांना तात्काळ अटक करावी.फसवणुकीसाठी स्थापन करण्यात आल्याचा आरोप असलेल्या शिवम इंडस्ट्रीज व आर. एन. ट्रेडिंग कंपनी यांची एसआयटीमार्फत सखोल चौकशी करावी.आशिष पिपरे यांनी जमा केलेल्या संपूर्ण मालमत्तेची एसआयटीमार्फत चौकशी करावी.ट्रॅक्टर खरेदी-विक्री प्रकरणात फसवणूक केल्याचा आरोप असलेल्या आशिष अरुण पिपरे, सोनाली आशिष पिपरे व अरुण लहुजी पिपरे यांना तात्काळ अटक करावी.चिचडोह बॅरेज पाण्याखाली गेलेल्या जमीन रजिस्ट्री प्रकरणातील संबंधित महिलेला तात्काळ न्याय द्यावा. आदी मागण्यांचा यात समावेश आहे. यावेळी माजी आमदार डॉ. होळी यांनी उपोषण कर्त्यांसमोर गडचिरोली चे पोलीस अधीक्षक निलोत्पल यांच्या सोबत फोन वर चर्चा केली असता पोलीस अधीक्षकांनी तात्काळ गडचिरोली पोलीस स्टेशन चे पोलीस निरीक्षक विनोद चव्हाण, चामोर्शी पोलीस स्टेशन चे पोलीस निरीक्षक दीपक डोम ह्यांना उपोषण स्थळी जाऊन माजी आमदार डॉ. होळी व उपोषण कर्त्यांशी चर्चा करण्यासाठी पाठविले. यावेळी माजी आमदार डॉ. होळी दोन्ही पोलीस निरीक्षक व उपोषण कर्त्यांना मध्ये मागण्यासंदर्भात चर्चा करण्यात आली.
