भादवण: (प्रतिनिधी)
येथील भादवण हायस्कूल व ज्युनिअर कॉलेजमध्ये ज्ञानपीठ पुरस्कार विजेते कविवर्य वि. वा. शिरवाडकर (कुसुमाग्रज) यांच्या जयंतीनिमित्त ‘मराठी भाषा गौरव दिन’ मोठ्या उत्साहात साजरा करण्यात आला. या निमित्ताने शाळेत विविध सांस्कृतिक व शैक्षणिक कार्यक्रमांचे आयोजन करण्यात आले होते.
कार्यक्रमाची सुरुवात कुसुमाग्रजांच्या प्रतिमा पूजनाने आणि दीपप्रज्वलनाने झाली. शाळेचे मुख्याध्यापक श्री. आर. जी. कुंभार सर यांनी प्रतिमेचे पूजन केले. इयत्ता ९ वी मधील विद्यार्थिनींनी सुंदर मराठी समूहगीत सादर करून कार्यक्रमाची प्रसन्न सुरुवात केली. कु. पायल सुतार हिने कार्यक्रमाचे प्रास्ताविक केले.
विद्यार्थ्यांचे विविध गुणदर्शन:
या निमित्ताने आयोजित वक्तृत्व स्पर्धेत भूमिका मुळीक, शामिका मुळीक, अमृता ढांगे, श्रावणी सिमणे, वैदेही परीत, अश्विता, आदिराज डोंगरे, सुशांत खुबे आणि अनुज पाटील या विद्यार्थ्यांनी कुसुमाग्रजांचे जीवनकार्य आणि मराठी भाषेचे महत्त्व यावर आपली मते व्यक्त केली. तसेच इयत्ता ९ वी च्या विद्यार्थिनींनी (प्राची सोंडकर, भूमिका मुळीक, प्रतीक्षा डोंगरे, सानिका वडराळे, पायल सुतार) स्वहस्ते तयार केलेली शुभेच्छा भेटकार्डे मुख्याध्यापक व सर्व शिक्षकवृंदाला देऊन मराठी दिनाच्या शुभेच्छा दिल्या.
विविध स्पर्धांचे आयोजन:
दिनाचे औचित्य साधून निबंध लेखन, कविता वाचन आणि चित्रकला स्पर्धांचे आयोजन करण्यात आले होते. विद्यार्थ्यांनी भित्तीपत्रिका आणि चित्रभित्तिका तयार करून त्यात उत्स्फूर्त सहभाग घेतला. लहान गटातील सार्थक, राज, वेदांत, पियुष, एकता, राजवी, आरोही आणि सान्वी यांनी सुंदर समूहगान सादर केले, तर आर्या कुंभार हिने सादर केलेल्या भावगीताने सर्वांची मने जिंकली.
मार्गदर्शन व सांगता:
कार्यक्रमात बोलताना श्री. पी. एस. गुरव सर यांनी मराठी भाषेचा गोडवा, शब्दसंपदा आणि तिची थोरवी यावर मार्गदर्शन केले. या कार्यक्रमाचे आयोजन मराठी विभागातील श्री. होरटे सर, श्री. वडर सर आणि कांबळे मॅडम यांनी केले होते. मुख्याध्यापक श्री. आर. जी. कुंभार सर यांनी कार्यक्रमाचे अध्यक्षस्थान भूषवले. यावेळी श्री. कोळी सर, नाईक मॅडम, बी. पी. कांबळे मॅडम आणि जाधव मॅडम उपस्थित होत्या.
कार्यक्रमाचे सूत्रसंचालन कु. भूमिका मुळीक हिने केले. शेवटी पसायदानाने कार्यक्रमाची सांगता झाली.
