आजरा: येथील नगरपंचायत क्षेत्रात सार्वजनिक बांधकाम विभागाने हाती घेतलेल्या रस्ते कामाचा पुरता बोजवारा उडाला असून, या विरोधात ‘गर्जना संघटना’ आता आक्रमक झाली आहे. रस्ते खोदकामामुळे होणाऱ्या त्रासाबाबत संघटनेचे मार्गदर्शक श्रीपाद कुलकर्णी यांनी प्रशासनाला जाब विचारत, सुधारणा न झाल्यास तीव्र आंदोलनाचा इशारा दिला आहे.
सविस्तर वृत्त असे की, आजरा शहरात सध्या बांधकाम विभागामार्फत रस्त्यांचे काम सुरू आहे. मात्र, ठेकेदार आणि संबंधित विभागाने कोणत्याही नियोजनाशिवाय रस्त्यांचे अस्ताव्यस्त खोदकाम करून ठेवल्याने नागरिकांना मोठा मनस्ताप सहन करावा लागत आहे. विशेषतः पाणीपुरवठा विभाग आणि बांधकाम विभाग यांच्यात समन्वयाचा प्रचंड अभाव असल्याचे दिसून येत असून, त्याचा फटका सर्वसामान्यांना बसत आहे.
या गंभीर प्रश्नावर श्रीपाद कुलकर्णी आणि स्थानिक नागरिकांनी आज संबंधित विभागाच्या अधिकाऱ्यांची भेट घेऊन त्यांना धारेवर धरले. “अनियमित काम करणाऱ्या ठेकेदारावर नगरपंचायत आणि बांधकाम विभागाने तातडीने दंडात्मक कारवाई करावी. जर प्रशासनाने ही दखल घेतली नाही, तर जबाबदार अधिकाऱ्यांच्या वेतनातून कपात करण्याची मागणी लावून धरली जाईल,” अशी ठाम भूमिका संघटनेने मांडली आहे.
येत्या काही दिवसांत रस्ते कामाच्या पद्धतीत सुधारणा न झाल्यास **’गर्जना स्टाईल’**ने विषय हाताळला जाईल, असा इशाराही यावेळी देण्यात आला. या पवित्र्यामुळे आता प्रशासन काय पावले उचलते, याकडे आजरावासियांचे लक्ष लागले आहे.
