माजी खासदार, माजी नगराध्यक्ष, माजी कुलगुरू व शिक्षणतज्ज्ञ आदरणीय डॉ. जे. एम. वाघमारे यांच्या निधनाची बातमी अत्यंत दुःखद आहे. त्यांच्या जाण्याने सामाजिक, शैक्षणिक व राजकीय क्षेत्रात मोठी पोकळी निर्माण झाली आहे.
लातूर येथील राजर्षी शाहू महाविद्यालयाचे प्राचार्य म्हणून त्यांनी दीर्घकाळ कार्य करत लातूरच्या शैक्षणिक उभारणीत मोलाचा वाटा उचलला. त्यांच्या कार्यकाळात लातूरचा शैक्षणिक दर्जा उंचावला गेला आणि एक आदर्श शिक्षण पद्धती विकसित झाली.
त्यामुळे त्यांना लातूरच्या शैक्षणिक प्रगतीचे शिल्पकार म्हणून गौरवले जाते.शिक्षण हे सर्वांसाठी असून ते गोर गरीब मुलांपर्यंत पोहोचले पाहिजे ही त्यांची धारणा होती. शिक्षण हे समाजपरिवर्तनाचे प्रभावी माध्यम आहे, या विचाराने त्यांनी विविध व्याख्यानमाला, समाजप्रबोधन उपक्रमाचे आयोजन सातत्याने केले त्यामुळे लातूरची एक वेगळी ओळख निर्माण झाली. त्यांच्या प्रेरणेतून अनेक विद्यार्थी आणि युवक घडले.
नांदेड येथील स्वामी रामानंद तीर्थ मराठवाडा विद्यापीठाचे पहिले कुलगुरू म्हणून त्यांनी विद्यापीठाला भक्कम पाया घालून सर्वांगीण विकासाची दिशा दिली. त्यांच्या नेतृत्वामुळे मराठवाड्यातील नांदेड, परभणी, लातूर, हिंगोली या जिल्ह्यांतील शैक्षणिक क्षेत्रात लक्षणीय परिवर्तन घडून आले.
सार्वजनिक जीवनात त्यांनी प्रामाणिकपणा, पारदर्शकता आणि कर्तव्यनिष्ठा जपत लोकप्रतिनिधी म्हणूनही उल्लेखनीय कार्य केले. त्यांचे विचार, कार्यपद्धती आणि समाजहिताची भूमिका सदैव प्रेरणादायी राहील.
ईश्वर त्यांच्या आत्म्यास चिरशांती देवो व त्यांच्या कुटुंबीयांना या दुःखातून सावरण्याची शक्ती प्रदान करो, ही प्रार्थना.भावपूर्ण श्रद्धांजली
