जत :(तालुका प्रतिनिधी)
जत शहराच्या वैभवात भर घालण्यासाठी तसेच नगरपरिषदेच्या उत्पन्नात वाढ करण्याच्या उद्देशाने शहरातील शासकीय ओढापात्रातील सर्व अतिक्रमणे हटविण्यात येणार असून त्या जागेवर भव्य शॉपिंग कॉम्प्लेक्स उभारण्याचा निर्णय घेतला जाणार असल्याची माहिती जत नगरपरिषदेचे उपनगराध्यक्ष विक्रम ताड यांनी दिली.
जत नगरीचे ग्रामदैवत श्री यल्लमा देवी मंदिर परिसरात आयोजित नगरपरिषदेच्या नगराध्यक्ष व नगरसेवकांच्या पदग्रहण सोहळ्यानिमित्त झालेल्या सत्कार समारंभात बोलताना गोपीचंद पडळकर यांनी शहर विकासासंदर्भात महत्त्वाची घोषणा केली होती. शहरातील शासकीय ओढापात्रातील सर्व खोक्यांच्या अतिक्रमणावर कारवाई करून त्या जागेचा विकास करण्यात येणार असून त्या ठिकाणी आधुनिक आणि भव्य शॉपिंग कॉम्प्लेक्स उभारण्यात येणार असल्याचे त्यांनी सांगितले.
या विकासकामांमध्ये कोणताही अडथळा निर्माण करणाऱ्यांची गय केली जाणार नाही, मग तो कोणताही व्यक्ती असो, असा इशाराही यावेळी देण्यात आला. ओढापात्रातील अतिक्रमण हटवून त्या जागेचा सुयोग्य विकास केल्यास जत शहराच्या सौंदर्यात व वैभवात मोठी भर पडणार आहे. तसेच उभारण्यात येणाऱ्या शॉपिंग कॉम्प्लेक्समुळे लहान-मोठ्या व्यापाऱ्यांना कायमस्वरूपी व्यवसायासाठी जागा उपलब्ध होणार असून नगरपरिषदेच्या उत्पन्नातही मोठी वाढ होणार आहे.
नगरपरिषद निवडणुकीदरम्यान आमदार गोपीचंद पडळकर यांनी जत शहराच्या विकासाची डिजिटल झलक मतदारांना दाखवली होती. त्यामध्ये शहरातील प्रमुख चौकांचे सुशोभीकरण, सर्व उद्यानांचा विकास, भूमिगत बंदिस्त गटार योजना, रस्त्यांचे मजबुतीकरण अशा विविध विकासकामांची आश्वासने देण्यात आली होती. या सर्व कामांची पूर्तता नजीकच्या काळात नागरिकांना प्रत्यक्ष पाहायला मिळणार असल्याचे उपनगराध्यक्ष विक्रम ताड यांनी सांगितले.
मतदारांना दिलेल्या आश्वासनांची पूर्तता करण्यासाठी नगरपरिषद प्रशासन शहराच्या विकासाला व उत्पन्न वाढीला प्राधान्य देत आहे. त्याचाच एक भाग म्हणून जत शहरातून जाणाऱ्या शासकीय ओढापात्राच्या दोन्ही बाजूंना सुमारे 30 मीटर अंतरात सुशोभीकरण करण्यात येणार आहे. ओढापात्रातील सर्व अतिक्रमणे हटवून त्या जागेचा नियोजनबद्ध विकास करत आधुनिक शॉपिंग कॉम्प्लेक्स उभारण्यात येणार असल्याचेही त्यांनी स्पष्ट केले.
यासंदर्भात राज्याच्या पर्यावरण मंत्री पंकजा मुडे यांनीही नगरपरिषद निवडणुकीदरम्यान जत शहरातील ओढापात्र सुशोभीकरणासाठी मोठा निधी देण्याची घोषणा केली होती. जतचे आमदार गोपीचंद पडळकर, नगरपरिषदेचे मुख्याधिकारी लक्ष्मण राठोड, नगराध्यक्ष डॉ. रवींद्र अरळी व सर्व नगरसेवक यांच्या सहकार्याने हे महत्त्वाकांक्षी काम पूर्ण केले जाणार असल्याचे उपनगराध्यक्ष विक्रम ताड यांनी सांगितले.
जत शहराच्या विकासासाठी हा प्रकल्प महत्त्वाचा टप्पा ठरणार असून शहराच्या सौंदर्याबरोबरच आर्थिक बळकटीसाठीही तो फायदेशीर ठरेल, असा विश्वास व्यक्त करण्यात येत आहे.
