दापोली, ता. ७ (वार्ताहर) : दापोली तालुक्यातील प्राथमिक आरोग्य केंद्र पिसई येथील आरोग्यसेविका जयश्री अनिल पांढरे यांना मारहाण झाल्याच्या घटनेचा निषेध करत दापोली तालुक्यातील आरोग्य विभागातील कर्मचारी व वैद्यकीय अधिकाऱ्यांनी आज दापोली पोलीस ठाण्यात धाव घेतली.परस्पर विरोधी तक्रार दाखल.
या घटनेतील आरोपींना तात्काळ अटक करावी, अशी मागणी करत पोलिस निरीक्षक महेश तोरस्कर यांना निवेदन देण्यात आले. आरोपींवर कारवाई न झाल्यास कामबंद आंदोलन करण्याचा इशाराही यावेळी देण्यात आला.
ही घटना दि. ६ मार्च रोजी सायंकाळी सुमारे ६.१५ वाजण्याच्या सुमारास दापोली येथील न्यायालयासमोर असलेल्या सतीमाता मंदिराजवळ घडली.दापोली पोलिसांकडून मिळालेल्या माहितीनुसार, संख्या कोळेकर यांच्या थार वाहनाच्या मागील कोपऱ्याला जयश्री पांढरे यांच्या दुचाकीचा हलका स्पर्श झाल्याने या प्रकरणावरून वाद निर्माण झाला.
त्याबाबत चर्चा करण्यासाठी पांढरे दाम्पत्य कोळेकर यांना भेटण्यासाठी गेले असता वाद वाढून भांडण झाले.त्यानंतर पांढरे दाम्पत्य तक्रार नोंदवण्यासाठी दुचाकीने दापोली पोलीस ठाण्याकडे येत असताना त्यांच्या मागून बुलेटवरून संख्या कोळेकर व त्यांचे पती ओमकार कोळेकर आले. न्यायालयासमोरील सतीमाता मंदिराजवळ त्यांनी पांढरे यांच्या दुचाकीला लाथ मारल्याने दोघेही खाली पडले. त्यानंतर शिवीगाळ करत मारहाण करण्यात आल्याची तक्रार जयश्री पांढरे यांनी पोलिसांत दिली आहे.
तक्रारीनुसार, संख्या कोळेकर, ओमकार कोळेकर तसेच अन्य दोन जणांनी पांढरे दाम्पत्याला मारहाण केली. तसेच काळ्या रंगाचा चाकू जयश्री पांढरे यांच्या मानेवर लावून जीवे मारण्याची धमकी दिल्याचेही तक्रारीत नमूद करण्यात आले आहे.या तक्रारीवरून दापोली पोलिसांनी भारतीय न्याय संहिता २०२३ अंतर्गत कलम ७४, ११५(२), ३५१(२), ३५२, ३(५) व ११८(१) अन्वये चार संशयितांविरोधात गुन्हा दाखल केला असून पुढील तपास उपनिरीक्षक ज्योती चव्हाण करत आहेत.दरम्यान, या प्रकरणात संख्या कोळेकर यांनीही जयश्री पांढरे, त्यांचे पती अनिल पांढरे आणि त्यांच्या भावाविरोधात परस्परविरोधी तक्रार दाखल केली आहे. या तक्रारीत पांढरे कुटुंबीयांनी जिममध्ये येऊन शिवीगाळ केली तसेच दुचाकी आडवी लावून मारहाण केल्याचा आरोप करण्यात आला आहे.
या तक्रारीनुसार पांढरे दाम्पत्य व त्यांच्या नातेवाइकाविरोधातही संबंधित कलमान्वये गुन्हा नोंदविण्यात आला आहे.दरम्यान, आरोग्य सेविकेवर झालेल्या या हल्ल्याच्या निषेधार्थ आज दापोली तालुक्यातील आरोग्य कर्मचारी आणि वैद्यकीय अधिकारी मोठ्या संख्येने दापोली पोलीस ठाण्यात एकत्र जमले. आरोग्य सेविकेवर हल्ला करणाऱ्यांना तात्काळ अटक करून कठोर कारवाई करावी, अन्यथा तीव्र आंदोलन छेडण्याचा इशारा यावेळी देण्यात आला.
