देवगड (प्रतिनिधी) : देवगड तालुक्यातील पुरळ गावातील ग्रामपंचायत कार्यालयात जागतिक महिला दिन उत्साहपूर्ण वातावरणात व थाटामाटात साजरा करण्यात आला. या कार्यक्रमाचे आयोजन ग्रामपंचायत सरपंच सौ. अनुश्री तावडे यांच्या मार्गदर्शनाखाली करण्यात आले असून कार्यक्रमाच्या अध्यक्षस्थानी रेखा तावडे होत्या.
कार्यक्रमाची सुरुवात दुपारी २.३० वाजता करण्यात आली. यावेळी जागतिक महिला दिनानिमित्त प्रस्तावना, मान्यवरांचे स्वागत, मार्गदर्शनपर भाषणे तसेच विविध उपक्रमांचे आयोजन करण्यात आले. कार्यक्रमात अपंग महिलांचा सत्कार करण्यात आला तसेच डॉक्टरांनी महिलांना आरोग्याबाबत मार्गदर्शन केले. आरोग्य सेविका राहणे मॅडम यांनीही महिलांशी संवाद साधत आरोग्याविषयी महत्त्वपूर्ण माहिती दिली.
याशिवाय महिलांसाठी हळदी-कुंकू समारंभ, संगीत खुर्ची स्पर्धा तसेच महिला प्रशिक्षण प्रमाणपत्रांचे वितरण करण्यात आले. फिटनेस कोच सुनयना दाते यांनी महिलांची मोफत आरोग्य तपासणी व मार्गदर्शन केले. यावेळी ग्रामपंचायतीतील महिला सदस्यांचाही सत्कार करण्यात आला.
कार्यक्रमात उपस्थित मान्यवरांनी महिलांविषयी आदर, त्यांचे अधिकार, समाजातील योगदान व त्यांच्या प्रगतीविषयी मार्गदर्शनपर विचार मांडले. आजच्या काळात महिला शिक्षण, आरोग्य, प्रशासन, क्रीडा तसेच विविध क्षेत्रांमध्ये मोठ्या प्रमाणावर पुढे येत असल्याचेही वक्त्यांनी नमूद केले.
छत्रपती शिवाजी महाराजांचे आशीर्वाद तसेच राजमाता जिजाऊ, महात्मा ज्योतिबा फुले, क्रांतिज्योती सावित्रीबाई फुले आणि झाशीची राणी यांच्या आदर्शातून आजची महिला प्रत्येक क्षेत्रात अग्रेसर असल्याचे यावेळी सांगण्यात आले.
कार्यक्रमाच्या शेवटी सरपंच सौ. अनुश्री तावडे यांच्या हस्ते अनेक महिलांचा सत्कार करण्यात आला. त्यानंतर त्यांनी मनोगत व्यक्त करत सर्व महिलांना पुढील वाटचालीसाठी शुभेच्छा देत कार्यक्रमाचा समारोप केला.
