.
कसारा : मध्य रेल्वेचे शेवटचे उपनगरीय रेल्वे स्थानक म्हणजेच कसारा स्थानक आहे.आज कसारा स्थानकात चक्क रेल्वे प्लॅटफॉर्म वर एका महिलेने एका गोंडस बाळाला जन्म दिला आहे. कसारा स्थानकात अगदीच माणुसकीचा प्रत्यय यावेळी पाहायला मिळाला आहे. मुंबई मधून बिहार ला जाणारे नागेंद्र कुमार यांची पत्नी ममता कुमारी यांना रेल्वे प्रवासा दरम्यान प्रसूती कळा सुरु झाल्या. दरम्यान कसारा स्थानकात सदर एक्सप्रेस ही इंजिन जोडण्या साठी थांबणार होती.
दरम्यान एक्सप्रेस ट्रेन कसारा स्थानकात पोहोचताच काही सज्जन नागरिकांनी तत्परतेने पुढाकार घेतला. काळूबाई चंद्रकांत लहाने आणि सरला खंडू भानगीर यांनी तातडीने धाडस दाखवत प्रसूतीसाठी मदत केली. याच वेळी प्राथमिक आरोग्य केंद्र कसारा येथील शुक्ला मॅडम यांनी कर्तव्यदक्ष नर्स सिस्टर सोनाली सांगळे यांना ही माहिती दिली.
माहिती मिळताच सोनालीताई तात्काळ कसारा रेल्वे स्थानकावर दाखल झाल्या. रेल्वे स्टेशनवर कोणतेही वैद्यकीय इन्स्ट्रुमेंट उपलब्ध नसताना देखील त्यांनी अत्यंत धैर्य आणि कौशल्याने प्रसूतीची पुढील प्रक्रिया पूर्ण केली. त्यांच्या अथक प्रयत्नांमुळे आई आणि बाळ दोघेही सुरक्षित राहिले.
यानंतर ॲम्ब्युलन्स चालक सतीश खरे, शोभा सोनवणे, जी.आर.पी.एफ. पोलिस शिपाई विष्णू सुपेकर, तसेच सरपंच प्रकाश वीर यांनी तातडीने मदत करत महिलेला प्राथमिक आरोग्य केंद्र कसारा येथे सुरक्षित पोहोचवून दाखल केले. सध्या महिलेची प्रकृती स्थिर असल्याची माहिती मिळाली आहे.
या संपूर्ण मोहिमेत ड्युटीवर असलेले स्टेशन मास्तर रोहित उबाळे आणि RPF वरिष्ठ पोलिस निरीक्षक सचिन मोरे यांनीही अत्यंत दक्षतेने आपले कर्तव्य पार पाडत माणुसकीचा धर्म जपला.
कसारा रेल्वे स्थानकावर घडलेली ही घटना म्हणजे संकटाच्या क्षणी अनेकांनी एकत्र येऊन केलेल्या मदतीची प्रेरणादायी कहाणी आहे. या सर्वांच्या धाडस, कर्तव्यनिष्ठा आणि माणुसकीमुळे एका नव्या जीवाचा सुरक्षित जन्म — आणि पुन्हा एकदा सिद्ध झाले की माणुसकीच सर्वात मोठा धर्म आहे.
सदर घटने बद्दल नेटकरी संमिश्र प्रतिक्रिया देताना दिसून येत होतें. अनेकांनी मदती साठी धावून आलेल्या नागरिकांचे आणि रेल्वे कर्मचारी तसेच नर्स सोनाली ताईचे आभार मानले आहेत तर काहींनी रेल्वे स्थानकात बेसिक वैद्यकीय सेवा आणि कर्मचारी तत्पर तेने उपलब्ध असावेत असं म्हटलं आहे.
कल्याण कसारा रेल्वे पॅसेंजर असोसिएशन चे माजी अध्यक्ष आणि सल्लगार शैलेश राऊत यांनी कसारा रेल्वे स्थानकात मूलभूत सुविधा असणारी वैद्यकीय रूम आणि त्यासाठी चा कर्मचारी यांची नितांत गरज असल्याचे म्हटलं आहे. रेल्वे चे वरिष्ठ अधिकारी यांच्या कडे तत्सम पत्र व्यवहार करून योग्य ती कार्यवाही तात्काळ करण्यासाठी आपण पाठपुरावा करणार आहोत असं शैलेश राऊत यांनी म्हटलं आहे.
