दापोली, दि. १४ (वार्ताहर) : रत्नागिरी जिल्ह्यातील दापोली तालुक्यातील आडे गावात पिसाळलेल्या कुत्र्याने अचानक हल्ला करत एकाच वेळी चार महिलांना चावा घेतल्याची धक्कादायक घटना घडली आहे. या घटनेमुळे गावात भीतीचे वातावरण निर्माण झाले असून ग्रामस्थांनी प्रशासनाच्या भूमिकेवर प्रश्नचिन्ह उपस्थित केले आहे.
मिळालेल्या माहितीनुसार, आडे गावात काही दिवसांपासून एक कुत्रा पिसाळलेल्या अवस्थेत फिरत होता. त्याने अचानक चार महिलांवर हल्ला करत त्यांना गंभीर जखमी केले. जखमी महिलांमध्ये कुसुम दीपक कालेकर, देवकी दामोदर झेंडेकर, भारती हशा कालेकर आणि अलका पालेकर यांचा समावेश आहे.
जखमी महिलांना तात्काळ दापोली उपजिल्हा रुग्णालयात दाखल करण्यात आले होते. मात्र, त्यांची प्रकृती गंभीर असल्याने पुढील उपचारासाठी त्यांना रत्नागिरी जिल्हा रुग्णालयात हलविण्यात आले आहे.
दरम्यान, आडे व उटंबर परिसरात कुत्रे व माकडांचा वाढता उपद्रव नागरिकांसाठी डोकेदुखी ठरत असून अशा घटनांची पुनरावृत्ती होऊ नये, यासाठी तातडीने ठोस उपाययोजना कराव्यात, अशी मागणी ग्रामस्थांकडून जोर धरत आहे.
प्राणी संरक्षणाचे नियम लक्षात घेता अशा परिस्थितीत नेमकी काय कारवाई करावी, याबाबतही ग्रामस्थांमध्ये संभ्रमाचे वातावरण आहे. त्यामुळे संबंधित प्रशासनाने याकडे गांभीर्याने लक्ष देत नागरिकांच्या सुरक्षिततेसाठी प्रभावी उपाययोजना कराव्यात, अशी मागणी करण्यात येत आहे.
आडे येथे पिसाळलेल्या कुत्र्याचा कहर; एकाच वेळी चार महिलांना श्वानदंश, ग्रामस्थांमध्ये भीतीचे वातावरण
