मारेगाव प्रतिनिधी :-
मारेगाव तालुक्यातील चिंचोली बोटोनी येथे असलेल्या जुन्या जिल्हा परिषद शाळेवरील अतिक्रमण अखेर प्रशासनाने हटवून ठोस कारवाई केल्याचे समोर आले आहे. या कारवाईमुळे स्थानिक नागरिकांमध्ये समाधान व्यक्त होत आहे.
माहितीनुसार, संबंधित शाळेच्या जागेवर एका गैर अर्जदाराने अवैधरित्या अतिक्रमण करून मालकी हक्क गाजवण्याचा प्रयत्न केला होता. ही शाळा अतिक्रमणमुक्त व्हावी, यासाठी गावातील माजी उपसरपंच भास्कर सिडाम, महादेव सिडाम तसेच इतर प्रतिष्ठित नागरिकांनी उपोषण आंदोलन सुरू केले होते.
या आंदोलनाची दखल घेत वणी विधानसभेचे आमदार संजय निळकंठ देरकर यांनी उपोषणस्थळी भेट देत आंदोलकांना सांत्वन केले आणि योग्य कारवाईचे आश्वासन दिले होते. त्यानंतर उपोषण स्थगित करण्यात आले होते.
यानंतर प्रशासनाने तातडीने कारवाई करत संबंधित अतिक्रमणधारकाला नोटीस बजावली आणि नियमानुसार अतिक्रमण हटविण्यात आले. या कारवाईवेळी तहसीलदार, गटविकास अधिकारी, ग्रामसेवक, सरपंच, पोलीस प्रशासन तसेच गावातील नागरिक मोठ्या संख्येने उपस्थित होते.
कागदोपत्री सातबारा उताऱ्यावर शाळेची नोंद असताना कोणालाही त्या जागेवर मालकी हक्क गाजवता येत नाही, हे प्रशासनाने या कारवाईतून स्पष्ट केले आहे. त्यामुळे उपोषणकर्त्यांच्या मागण्यांना न्याय मिळाला असून, त्यांचे समाधान झाले आहे.
