मारेगाव प्रतिनिधी :-
मारेगाव तालुक्यात डायल 112 या आपत्कालीन सेवेला खोटी माहिती देत पोलिसांची दिशाभूल केल्याचा प्रकार उघडकीस आला आहे. संबंधित व्यक्तीने मद्यधुंद अवस्थेत वारंवार 112 वर फोन करून चुकीची माहिती दिल्याचे समोर आले आहे.
या प्रकरणाची गंभीर दखल घेत मारेगाव पोलिसांनी तत्काळ तपास यंत्रणा सक्रिय केली. तपासादरम्यान आरोपीचा शोध घेण्यात आला असून त्याच्याविरुद्ध मारेगाव पोलिस ठाण्यात गुन्हा दाखल करण्यात आला आहे.
पोलिसांनी स्पष्ट केले आहे की, आपत्कालीन सेवांना खोटे कॉल करणे, चुकीची माहिती देणे किंवा पोलिसांची दिशाभूल करणे हा कायद्याने गुन्हा आहे. अशा कृत्यांमुळे खऱ्या आपत्कालीन परिस्थितीत मदतीची गरज असलेल्या नागरिकांना उशीर होऊ शकतो.
यापुढे अशा प्रकारच्या घटना घडू नयेत, यासाठी पोलिसांनी नागरिकांना सतर्क राहण्याचे आणि डायल 112 सेवेचा जबाबदारीने वापर करण्याचे आवाहन केले आहे. तसेच, चुकीची माहिती देणाऱ्यांवर कडक कारवाई करण्यात येणार असल्याचा इशाराही पोलिसांकडून देण्यात आला आहे.
