उदगीर प्रतिनिधी :-
पवित्र रमजान महिन्याची सांगता होत असताना साजऱ्या होणाऱ्या रमजान ईदच्या निमित्ताने आमदार संजय बनसोडे यांनी उदगीर येथील ईदगाह मैदानावर उपस्थित राहून मुस्लिम बांधवांना शुभेच्छा दिल्या.
यावेळी बोलताना त्यांनी सांगितले की, रमजान महिना हा संयम, त्याग, दया आणि मानवतेचा संदेश देणारा आहे. उपवास, नमाज आणि दानधर्माच्या माध्यमातून समाजात बंधुभाव आणि एकात्मता वाढीस लागते. ईदचा सण हा आनंद, शांतता आणि एकमेकांप्रती प्रेम व्यक्त करण्याचा उत्सव असून, समाजात एकोप्याची भावना दृढ करणारा आहे.
कार्यक्रमादरम्यान आ. संजय बनसोडे यांनी उपस्थित मुस्लिम बांधवांना गुलाबपुष्प देऊन गळाभेट घेत ईदच्या शुभेच्छा दिल्या. या प्रसंगी परिसरात आनंदाचे आणि उत्साहाचे वातावरण निर्माण झाले होते.
या वेळी मौलाना मुस्ताक खतीब, माजी आमदार गोविंदराव केंद्रे, नगरसेवक सचिन हुडे, गटनेते अनिल मुदाळे, जि.प. सदस्य डॉ. दिपक सोमवंशी, ज्ञानेश्वर बिरादार, उपजिल्हाधिकारी सुशांत शिंदे, तहसीलदार राम बोरगावकर, मुख्याधिकारी सोमनाथ जाधव यांच्यासह अनेक मान्यवर आणि नागरिक मोठ्या संख्येने उपस्थित होते.
पुढे बोलताना आ. बनसोडे यांनी सर्व समाजबांधवांना आवाहन केले की, धर्म, जात, पंथ यापलीकडे जाऊन सर्वांनी एकोप्याने राहावे आणि समाजाच्या प्रगतीसाठी हातभार लावावा. ईदच्या या पावन प्रसंगी सर्वांच्या जीवनात सुख, शांती आणि समृद्धी नांदो, अशी प्रार्थनाही त्यांनी व्यक्त केली.
या शुभेच्छांमुळे परिसरातील मुस्लिम बांधवांमध्ये आनंदाचे वातावरण पसरले असून कार्यक्रम उत्साहात पार पडला.
