उदगीर प्रतिनिधी 🖊️
ग्राहक समिती महाराष्ट्र राज्य तसेच ग्राहक जनजागरण व मार्गदर्शन संस्था यांच्या संयुक्त विद्यमाने जागतिक ग्राहक हक्क दिनाचा कार्यक्रम उदगीर येथील श्री हावगीस्वामी महाविद्यालयाच्या सभागृहात उत्साहात पार पडला. याच कार्यक्रमात महाराष्ट्र राज्य ग्राहक समितीची नवी कार्यकारिणी जाहीर करण्यात आली.
कार्यक्रमाच्या अध्यक्षस्थानी महाविद्यालयाचे प्राचार्य डॉ. ए. ए. काळगापुरे होते. प्रमुख पाहुणे म्हणून डॉ. एन. जी. यमेकर (उपप्राचार्य), डॉ. एस. डी. लोहारे, डॉ. ए. आर. कवठाळे, प्रा. मनोहर भालके, दत्ता बिरादार, राम राठोड उपस्थित होते. तसेच मार्गदर्शक म्हणून संस्थापक राज्याध्यक्ष तानाजीराव नरहरीराव गुंड, प्रदेश कार्याध्यक्ष सतीशकुमार बुरगुटे, बी. जी. शिंदे आदी मान्यवर उपस्थित होते.
या वेळी ग्राहक समिती महाराष्ट्र राज्याच्या नवनिर्वाचित पदाधिकाऱ्यांची घोषणा करण्यात आली. मराठवाडा अध्यक्ष तथा राज्य संघटक पदावर बी. जी. शिंदे (अतनूरकर) यांची निवड करण्यात आली. त्यांना प्राचार्य काळगापुरे, राज्याध्यक्ष तानाजी गुंड आणि कार्याध्यक्ष सतीशकुमार बुरगुटे यांच्या हस्ते नियुक्तीपत्र देण्यात आले.
तसेच उदगीर तालुका अध्यक्षपदी प्राचार्य व्यंकटराव कणसे, कार्याध्यक्षपदी प्रा. डॉ. अविनाश प्रभातराव पाटील, उपाध्यक्षपदी प्रा. डॉ. सुनील यशवंतराव ढगे यांची निवड करण्यात आली. इतर पदाधिकाऱ्यांचीही घोषणा करण्यात आली असून विविध स्तरांवर संघटना मजबूत करण्यात आली आहे.
कार्यक्रमाला विद्यार्थी, पालक, युवक-युवती, ग्राहक स्वयंसेवक व पदाधिकारी मोठ्या संख्येने उपस्थित होते.
या संस्थेचे मुख्य उद्दिष्ट ग्राहकांमध्ये जनजागृती करणे, सदोष वस्तू व सेवांविरुद्ध आवाज उठवणे, सायबर फसवणुकीपासून संरक्षण देणे आणि तक्रार निवारण मंचाद्वारे ग्राहकांना न्याय मिळवून देणे हे आहे. नव्याने जाहीर झालेली कार्यकारिणी ग्राहकांच्या हक्कांसाठी सक्रियपणे काम करणार असल्याचा विश्वास व्यक्त करण्यात आला.
