भादवण (प्रतिनिधी): डॉ. ए.पी.जे. अब्दुल कलाम जिल्हास्तरीय विज्ञान प्रज्ञाशोध परीक्षेत भादवण हायस्कूल, भादवण येथील विद्यार्थिनींनी उल्लेखनीय यश संपादन केले आहे. ही परीक्षा कोल्हापूर जिल्हा माध्यमिक व उच्च माध्यमिक शाळा मुख्याध्यापक संघाच्या विज्ञान विषय समितीमार्फत घेण्यात आली होती.
इयत्ता नववीतील गुणवंत विद्यार्थिनी सानिका प्रकाश वडराळे हिने उत्कृष्ट कामगिरी करत ८८ गुण मिळवून गडहिंग्लज-आजरा-चंदगड उपविभागात द्वितीय क्रमांक पटकावला. तिच्या या यशाबद्दल शैक्षणिक क्षेत्रात कौतुक होत आहे.
या यशस्वी विद्यार्थिनीचा सन्मान महाराष्ट्र राज्य माध्यमिक व उच्च माध्यमिक शिक्षण मंडळ, कोल्हापूर चे सहसचिव बी. एम. किल्लेदार, रसायनशास्त्र विभाग प्रमुख उर्मिलादेवी सूर्यवंशी तसेच मुख्याध्यापक संघाचे चेअरमन राहुल पवार यांच्या हस्ते करण्यात आला. यावेळी सन्मानचिन्ह, प्रमाणपत्र, पुस्तक व रोख रक्कम देऊन गौरविण्यात आले.
तसेच प्रतीक्षा प्रशांत डोंगरे व आर्या काशिनाथ कुंभार या विद्यार्थिनीही प्रज्ञापात्र ठरल्या असून त्यांचेही अभिनंदन करण्यात येत आहे. या यशासाठी विद्यार्थ्यांना विज्ञान विषय समितीचे सदस्य प्रशांत गुरव यांचे मार्गदर्शन लाभले.
विद्यार्थ्यांच्या या यशाबद्दल शाळेचे मुख्याध्यापक आर. जी. कुंभार, शिक्षक-शिक्षकेतर कर्मचारी तसेच पालकांनी विद्यार्थिनींचे मनःपूर्वक अभिनंदन केले आहे. तसेच आजरा महाल शिक्षण मंडळ चे अध्यक्ष जयवंतराव शिंपी, सचिव अभिषेकदादा शिंपी व संचालक मंडळ यांचेही मार्गदर्शन व प्रोत्साहन लाभले.
👉 या यशामुळे भादवण हायस्कूलचे नाव जिल्ह्यात उज्ज्वल झाले आहे.
