भोजनदान, मान्यवरांचा सत्कार आणि बुद्ध-भीम गीतांच्या सुरेल कार्यक्रमाला समाजबांधवांचा उत्स्फूर्त प्रतिसाद
मारेगाव, प्रतिनिधी : भगवान गौतम बुद्ध यांच्या करुणा, मैत्री, प्रज्ञा आणि समतेच्या विचारांचा जागर करीत धम्मराजिका बुद्ध विहार, मारेगाव येथे वर्षावास समापन व कोजागिरी पौर्णिमेनिमित्त आयोजित धार्मिक आणि सामाजिक कार्यक्रम उत्साहात पार पडला. सोमवार, दि. २६ ऑक्टोबर २०२६ रोजी आयोजित या सोहळ्याला मान्यवरांसह समाजबांधवांची मोठ्या संख्येने उपस्थिती लाभली.
कार्यक्रमाची सुरुवात डॉ. बाबासाहेब आंबेडकर यांच्या पुतळ्याला अभिवादन करून करण्यात आली. त्यानंतर धम्मराजिका बुद्ध विहारात बुद्ध वंदना व पूजाविधी पार पडला. यावेळी सामाजिक आणि धम्मकार्यामध्ये उल्लेखनीय योगदान देणाऱ्या मान्यवरांचा सत्कार करण्यात आला.
या सोहळ्याला वणी विधानसभा क्षेत्राचे आमदार संजय भाऊ देरकर, यवतमाळ जिल्हा मध्यवर्ती सहकारी बँकेच्या संचालिका किरण ताई देरकर, रंगनाथ स्वामी सहकारी पतसंस्थेचे अध्यक्ष काळे साहेब, वणी नगरपालिकेचे माजी नगराध्यक्ष सुरेश भाऊ रायपुरे, महाराष्ट्र नवनिर्माण सेनेचे नेते राजूभाऊ उंबरकर, मारेगाव नगरपंचायतीचे नगराध्यक्ष मनीष मस्की, उदय भाऊ रायपुरे, दुष्यंत जयस्वाल, वणीचे ठाणेदार भानुदासजी पिदुरकर व त्यांच्या पत्नी कल्पना पिदुरकर, मारेगावचे ठाणेदार सागर दांनडे यांच्यासह विविध क्षेत्रांतील मान्यवर उपस्थित होते.
बुद्ध-भीम गीतांनी रंगली भजन संध्या
कार्यक्रमाचे विशेष आकर्षण ठरलेल्या जगन चांदेकर ग्रुपच्या बुद्ध-भीम गीतांच्या आणि भजनांच्या कार्यक्रमाने उपस्थितांची मने जिंकली. भगवान गौतम बुद्धांचे विचार, महामानव डॉ. बाबासाहेब आंबेडकरांचे समतावादी तत्त्वज्ञान आणि सामाजिक प्रबोधनाचा संदेश देणाऱ्या गीतांनी संपूर्ण परिसर धम्ममय झाला.
भोजनदानातून सामाजिक एकोप्याचा संदेश
या निमित्ताने आयुष्यमती पूनम अजय रायपुरे यांच्या वतीने सस्नेह भोजनदानाचे आयोजन करण्यात आले होते. सहभोजनाच्या माध्यमातून बंधुभाव, सामाजिक एकोपा आणि आपुलकीचा संदेश देण्यात आला. उपस्थित मान्यवर आणि समाजबांधवांनी या उपक्रमात उत्स्फूर्त सहभाग नोंदविला.
रायपुरे परिवाराकडून आयोजकांचे आभार
कार्यक्रम यशस्वी करण्यासाठी धम्मराजिका बुद्ध विहार, रमाई महिला मंडळ, युवकवर्ग आणि समाजबांधवांनी विशेष परिश्रम घेतले. नियोजनापासून ते कार्यक्रमाच्या व्यवस्थेपर्यंत सर्वांनी मोलाचे सहकार्य केले. या यशस्वी आयोजनाबद्दल रायपुरे परिवाराच्या वतीने सर्व आयोजक, महिला मंडळ, युवकवर्ग, समाजबांधव, उपस्थित मान्यवर आणि सहकार्य करणाऱ्या प्रत्येकाचे मनःपूर्वक आभार मानण्यात आले
वर्षावास समापन सोहळ्याच्या माध्यमातून भगवान गौतम बुद्धांच्या विचारांचा प्रसार, डॉ. बाबासाहेब आंबेडकरांच्या समतावादी विचारांची प्रेरणा आणि समाजातील एकता, बंधुता व सामाजिक सलोखा अधिक दृढ करण्याचा संदेश देण्यात आला.
