नांदेड (प्रतिनिधी – मोईन): किनवट येथे आधार बहुउद्देशीय सेवाभावी संस्था यांच्या वतीने रविवारी (दि. २२ मार्च) सर्वधर्मीय वधू-वरांचा सामूहिक विवाह सोहळा व परिचय मेळावा उत्साहात पार पडला. या सोहळ्यात एकूण तीन जोडपी विवाहबद्ध झाली.
या मेळाव्यात विधवा, विधूर, घटस्फोटित, परित्यक्ता तसेच दिव्यांग विवाहेच्छुकांचा लक्षणीय सहभाग होता. विशेष म्हणजे, एका दिव्यांग वधू-वरांचा विवाह हा कार्यक्रमाचे प्रमुख आकर्षण ठरला.
यावेळी नवदांपत्यांना प्रा. जयश्री भरणे यांच्या हस्ते सोन्याचे मणिमंगळसूत्र व चांदीची जोडवी भेट देण्यात आली. तसेच सामाजिक बांधिलकी जपत विधवा महिलांना पाच शिलाई मशीन आणि गरजू महिलांना शंभर साड्यांचे वितरण करण्यात आले.
कार्यक्रमाच्या अध्यक्षस्थानी माजी नगराध्यक्ष व्यंकटराव नेम्मानीवार होते. प्रमुख पाहुणे म्हणून के. मूर्ती, नंदिनी टारपे, नगरसेवक राम नेम्मानीवार, निसार भाटी, अन्वर मिर्झा, गणेश दासरे, अॅड. मिलिंद सपें, उषा वाढवे आदी मान्यवर उपस्थित होते.
कार्यक्रमाची रंगत प्रा. सुरेश पाटील व प्रतिभा पाटील यांच्या गायनाने वाढवली. प्रास्ताविक प्रा. जयश्री भरणे यांनी केले, तर सूत्रसंचालन उत्तम कानिंदे यांनी केले.
👉 या सामूहिक विवाह सोहळ्यामुळे सामाजिक एकात्मतेचा संदेश देत गरजू वधू-वरांना नवजीवनाची नवी सुरुवात मिळाली.
