मारेगाव (प्रतिनिधी) : मारेगाव शहराकडून वणीकडे जाणाऱ्या महामार्गावर गौराळा खदानजवळ भीषण अपघात घडून एका युवकाचा जागीच मृत्यू झाल्याची घटना उघडकीस आली आहे. या घटनेमुळे परिसरात खळबळ उडाली आहे.
मिळालेल्या माहितीनुसार, रस्त्याच्या कडेला एक टिप्पर बंद अवस्थेत उभा होता. मात्र त्याचे साईड इंडिकेटर बंद होते तसेच मागील बाजूस रेडियम चिन्ह नव्हते. याचदरम्यान विरुद्ध दिशेने येणाऱ्या मोटारसायकल चालकाचे नियंत्रण सुटल्याने हा अपघात घडल्याची प्राथमिक माहिती समोर आली आहे.
या अपघातात नारायण पंढरी पोईनकर (वय अंदाजे ३५) यांचा जागीच मृत्यू झाला. या प्रकरणी मृतकाचा भाऊ नितेश पंढरी पोइणकर यांनी मारेगाव पोलीस ठाण्यात तक्रार दाखल केली आहे.
त्यानुसार संबंधित टिप्पर चालकाविरुद्ध भारतीय न्याय संहिता (BNS) कलम २८१, १०६ तसेच मोटार वाहन कायद्यानुसार कलम १३४ (अ, ब) अंतर्गत गुन्हा नोंद करण्यात आला आहे.
अपघातग्रस्त मोटारसायकल क्रमांक MH 29 8418 तर टिप्पर क्रमांक MH 31 AP 7068 असल्याचे समोर आले आहे.
दरम्यान, एकीकडे रस्ता सुरक्षा सप्ताह सुरू असताना अशा प्रकारची दुर्घटना घडल्याने रस्ते सुरक्षेबाबत गंभीर प्रश्न उपस्थित होत आहेत. नागरिकांकडून अशा निष्काळजीपणावर कठोर कारवाईची मागणी केली जात आहे.
