◆आरोपीची रवानगी न्यायालयीन कोठडीत
कुंडलवाडी (सिध्दार्थ कांबळे)
महिला व बालकांविरुद्धच्या गुन्ह्यांत तत्परतेने कारवाई करण्याच्या पोलीस अधीक्षकांच्या आदेशाला कुंडलवाडी पोलिसांनी अक्षरशः सार्थ ठरवले आहे. एका महाविद्यालयीन तरुणीचा विनयभंग करून तिला जीवे मारण्याची धमकी देणाऱ्या आरोपीला अटक केल्यानंतर, केवळ ३६ तासांत तपास पूर्ण करून कुंडलवाडी पोलिसांनी न्यायालयात दोषारोपपत्र दाखल केले आहे.
पोलिसांनी दिलेल्या माहितीनुसार, पीडित मुलगी जून २०२५ पासून कॉलेजला ये-जा करत असताना,तिच्या मैत्रिणीचा भाऊ तिला व तिच्या मैत्रिणीला सोडण्यासाठी दुचाकीवर येत असे.यावेळी आरोपीने पीडितेशी जवळीकता साधून तिचा विनयभंग केला व तिचा पाठलाग करून बोलण्यासाठी दबाव टाकला. पीडितेने नकार दिल्यानंतर संतापलेल्या आरोपीने २१ मार्च २०२६ च्या मध्यरात्री पीडितेच्या घरी जाऊन तिला व तिच्या आई-वडिलांना चाकूचा धाक दाखवून जीवे मारण्याची धमकी दिली.पीडितेने कुंडलवाडी पोलीस ठाण्यात तक्रार दिल्यानंतर, पोलीस अधीक्षक अबिनाशकुमार यांच्या ‘मिशन निर्भया’ मोहिमेअंतर्गत तातडीने सूत्रे हलवण्यात आली.सहाय्यक पोलीस निरीक्षक ज्ञानेश्वर शिंदे,व्यंकट घोंगडे,रघुवीरसिंह चौहाण,शिवराज गंगुलवार,आनंदराव सावरगावे यांनी अवघ्या सहा तासात आरोपी नरेश बजरंगराव जाधव (रा.माष्टी ता.धर्माबाद) यासअटक केली.
सहाय्यक पोलीस निरीक्षक ज्ञानेश्वर शिंदे,व्यंकट घोंगडे,यांनी गुन्ह्याचा सखोल तपास करून सर्व पुरावे गोळा केले आणि गुन्हा दाखल झाल्यापासून अवघ्या ३६ तासाच्या आत न्यायालयात दोषारोपपत्र सादर केले. न्यायालयाने आरोपीची रवानगी न्यायालयीन कोठडीत केली आहे.
या उल्लेखनीय आणि वेगवान कामगिरीबद्दल पोलीस अधीक्षक श्री.अबिनाश कुमार यांनी कुंडलवाडी पोलीस पथकाचे विशेष अभिनंदन केले आहे. महिलांच्या सुरक्षिततेसाठी नांदेड पोलीस सदैव तत्पर असल्याचा संदेश या कारवाईतून देण्यात आला आहे.हि कामगिरी पोलीस अधीक्षक अबिनाशकुमार,अप्पर पोलीस अधीक्षक अर्चना पाटील, उपविभागीय पोलीस अधिकारी दशरथ पाटील यांच्या मार्गदर्शनाखाली करण्यात आली.
