शास्त्रीय, उपशास्त्रीय, नाट्यसंगीत, अभंग आणि गौळणींची सुरेल मेजवानी; नागरिकांचा उत्स्फूर्त प्रतिसाद
प्रतिनिधी : भारत कवितके
कांदिवली पश्चिम येथे दीपावलीनिमित्त आयोजित करण्यात आलेला ‘दिवाळी पहाट’ हा सांगीतिक कार्यक्रम उत्साहात आणि रंगतदार वातावरणात संपन्न झाला. मंगळवार, दिनांक १० नोव्हेंबर २०२६ रोजी सकाळी ६ ते ११ वाजेपर्यंत झालेल्या या कार्यक्रमात प्रसिद्ध गायक राजाराम सुतार अर्थात बाबल गुरुजी यांनी आपल्या सुरेल गायनाने उपस्थित रसिकांना मंत्रमुग्ध केले.
शैलजा गिरकर फाऊंडेशन आणि श्री दत्त कृपा संगीत विद्या प्रसारक मंडळ, मुंबई यांच्या संयुक्त विद्यमाने या कार्यक्रमाचे आयोजन करण्यात आले होते. शैलजा गिरकर फाऊंडेशनच्या विश्वस्त क्रांती गिरकर कुंदर आणि माजी मंत्री आमदार विजयभाई गिरकर यांनी कार्यक्रमाचे नियोजन केले होते. कार्यक्रमाचे सूत्रसंचालन संतोष जाधव यांनी केले.
या संगीत मैफलीत शास्त्रीय, उपशास्त्रीय, नाट्यसंगीत, अभंग आणि गौळण अशा विविध संगीत प्रकारांची सुरेल मेजवानी रसिकांना अनुभवायला मिळाली. शास्त्रीय संगीताच्या हिंदुस्थानी आणि कर्नाटकी परंपरांचा संदर्भ देत बाबल गुरुजी यांनी विविध रचनांचे सादरीकरण केले. ‘माधो पिया बिदेश गयो’, ‘गुंतता हृदय हे’, ‘हा प्रणय परिमळे’, ‘विठ्ठल कानडू बोलू’, ‘सण दिवाळीचा आला’, ‘देव देखिला देखिला, आम्हा आनंद झाला’, ‘सुरत मधून वाजवितो रुणझुण’ आणि ‘अखंड लागले ध्यान’ यांसारख्या रचनांनी कार्यक्रमात रंगत आणली.
संतपरंपरेतील अभंग सादर करताना ‘काळ देहाशी आला’ या अभंगातून संतांनी मृत्यूकडे पाहण्याचा आध्यात्मिक दृष्टिकोनही उलगडून दाखविला. बाबल गुरुजी आणि त्यांच्या सहकाऱ्यांच्या प्रभावी सादरीकरणाला रसिकांनी उत्स्फूर्त दाद दिली.
कार्यक्रमादरम्यान उपस्थित मान्यवरांचा आणि कलाकारांचा सत्कार करण्यात आला. भारतीय जनता पक्षाचे उत्तर मुंबई जिल्हाध्यक्ष व नगरसेवक बाळा तावडे, प्रमोद घाग, संजय बाविस्कर, संतोष घाडगे, विजय गवळी, कल्पेश घाग आणि राधेश्याम गुप्ता यांचा सत्कार करण्यात आला.
या सुरेल दिवाळी पहाट कार्यक्रमाला परिसरातील महिला व पुरुष नागरिकांनी मोठ्या संख्येने उपस्थिती लावली. पहाटेच्या प्रसन्न वातावरणात संगीताचा आनंद घेत रसिकांनी दिवाळी सणाची सुरेल सुरुवात केली. कार्यक्रमामुळे कांदिवली परिसरात सांस्कृतिक आणि भक्तिमय वातावरण निर्माण झाले.
