ज्ञानेश्वरी पारायण, हरिकीर्तनासह सामाजिक उपक्रम; ज्येष्ठ नागरिकांचा सन्मान आणि विद्यार्थ्यांना शैक्षणिक साहित्याचे वाटप
मोठे वढाव (ता. पेण) येथील वैकुंठवासी हरिभक्त महादेव बाबा वर्तक यांचा १९ वा पुण्यस्मरण सोहळा ज्ञानेश्वरी पारायण आणि हरिकीर्तनाच्या भक्तिमय वातावरणात उत्साहात संपन्न झाला. नामगजर, प्रवचन आणि विविध सामाजिक उपक्रमांच्या माध्यमातून बाबांच्या स्मृतींना अभिवादन करण्यात आले.
या सोहळ्यात शिवाजी म्हात्रे सर यांनी ज्ञानेश्वरी पारायणाचे नेतृत्व केले. युवा कीर्तनकार प्रशांत महाराज वर्तक यांनी संत तुकाराम महाराजांच्या ‘शुद्ध बीजापोटी फळे रसाळ गोमटी’ या अभंगावर निरूपण करत तरुण पिढीला प्रेरणा देणारे विचार मांडले. वैकुंठवासी महादेव बाबांनी आपल्या आचरणातून गुरूसेवा, गुरुभक्ती आणि सदाचाराचे महत्त्व समाजासमोर ठेवले होते, असे विचार यावेळी व्यक्त करण्यात आले.
या निमित्ताने महादेव बाबा शैक्षणिक व सामाजिक ट्रस्टच्या वतीने सामाजिक उपक्रम राबविण्यात आले. ट्रस्टचे अध्यक्ष कृष्णा वर्तक यांच्या पुढाकाराने ८० वर्षे पूर्ण केलेल्या ज्येष्ठ नागरिकांना वस्त्रदान करून सन्मानित करण्यात आले. तसेच दहावीच्या विद्यार्थ्यांना लेखन साहित्याचे वाटप करण्यात आले. ज्ञानेश्वरी पारायणात सहभागी झालेल्यांसह ज्येष्ठ नागरिकांचा शाल व श्रीफळ देऊन गौरव करण्यात आला.
कार्यक्रमाच्या शेवटी पुष्पवृष्टी करून महादेव बाबांना श्रद्धांजली अर्पण करण्यात आली. त्यानंतर अन्नदानाने या पुण्यस्मरण सोहळ्याची सांगता झाली. धार्मिक परंपरेसोबतच शैक्षणिक आणि सामाजिक बांधिलकी जपणारा हा सोहळा भाविकांसाठी प्रेरणादायी ठरला.
