राजुरी (ता. जुन्नर): महारिया चॅरिटेबल ट्रस्ट संचलित सह्याद्री व्हॅली कॉलेज ऑफ इंजिनिअरिंग अँड टेक्नॉलॉजी, राजुरी येथे आयोजित भव्य कॅम्पस प्लेसमेंट ड्राईव्हमध्ये अभियांत्रिकीच्या एकूण २२ गुणवंत विद्यार्थ्यांची जागतिक स्तरावरील नामांकित कंपन्यांमध्ये निवड झाली आहे. या यशामुळे महाविद्यालयाच्या शैक्षणिक गुणवत्तेचा पुन्हा एकदा ठसा उमटला आहे.
या निवड प्रक्रियेत सॅमसंग समूहाच्या हर्मन इंटरनॅशनल सॅमसंग कंपनी तसेच जॉन डियर ग्रुपची विरिटेगन इंडिया या कंपन्यांचा प्रमुख सहभाग होता. महारिया चॅरिटेबल ट्रस्टचे खजिनदार सचिन चव्हाण, संचालक के. आर. भानुशाली आणि अकॅडमिक डीन पी. बालारामडू यांच्या प्रमुख उपस्थितीत ही प्रक्रिया उत्साहात पार पडली.
महाविद्यालयाचे ट्रेनिंग अँड प्लेसमेंट ऑफिसर (TPO) प्रा. मुरलीधर कुरकुटे यांनी सांगितले की, ग्रामीण भागातील विद्यार्थ्यांना सॅमसंग आणि जॉन डियरसारख्या आंतरराष्ट्रीय कंपन्यांमध्ये काम करण्याची संधी मिळणे ही संस्थेसाठी अत्यंत अभिमानाची बाब आहे.
कॅम्पस भरती प्रक्रियेमध्ये लेखी परीक्षा, तांत्रिक मुलाखत आणि मानव संसाधन (HR) मुलाखत अशा विविध टप्प्यांचा समावेश होता. या सर्व टप्प्यांमध्ये विद्यार्थ्यांनी उत्कृष्ट कामगिरी करत आपली गुणवत्ता सिद्ध केली.
महाविद्यालयाचे प्राचार्य, प्रशिक्षण व प्लेसमेंट विभाग प्रमुख तसेच सर्व प्राध्यापकांनी निवड झालेल्या विद्यार्थ्यांचे अभिनंदन करून त्यांच्या उज्ज्वल भविष्यासाठी शुभेच्छा दिल्या. विद्यार्थ्यांच्या या यशामागे गुणवत्तापूर्ण शिक्षण, प्रशिक्षण कार्यक्रम आणि उद्योगाभिमुख उपक्रमांचा मोठा वाटा असल्याचे त्यांनी नमूद केले.
या उल्लेखनीय यशामुळे सह्याद्री व्हॅली महाविद्यालयाच्या प्लेसमेंट परंपरेत आणखी एक मानाचा तुरा रोवला गेला असून, संपूर्ण परिसरातून विद्यार्थ्यांचे कौतुक होत आहे.
