“लहरों से डरकर नौका पार नहीं होती,
कोशिश करने वालों की हार नहीं होती…”
दोंडाईचा (प्रतिनिधी): दिव्यांग क्षेत्रात बौद्धिक अक्षम विद्यार्थ्यांच्या सर्वांगीण विकासासाठी मायेच्या ओलाव्याने आणि समर्पित भावनेने कार्य करणाऱ्या विशेष शिक्षिका सौ. मनीषा अशोक आव्हाड / घुगे यांना ‘महिला रत्न’ राज्यस्तरीय पुरस्काराने सन्मानित करण्यात आले आहे. त्यांच्या शैक्षणिक व सामाजिक कार्याची राज्यस्तरावर दखल घेण्यात आली आहे.
नैसर्गिक मानव अधिकार सुरक्षा परिषद फोरमच्या वतीने आयोजित राज्यस्तरीय पुरस्कार सोहळा-२०२६ अंतर्गत हा सन्मान प्रदान करण्यात आला. दोंडाईचा येथील निवासी मतिमंद विद्यालयात विशेष शिक्षिका म्हणून कार्यरत असलेल्या सौ. आव्हाड या गेल्या २५ वर्षांपासून बौद्धिक दिव्यांग विद्यार्थ्यांना शिक्षण देत आहेत. त्यांच्या कार्यामुळे अनेक विद्यार्थ्यांच्या आयुष्यात सकारात्मक बदल घडले आहेत.
महिला दिनाचे औचित्य साधून आयोजित या सोहळ्यात सन्माननीय आमदार सौ. मंजुळाताई गावित यांच्या हस्ते त्यांना पुरस्कार प्रदान करण्यात आला. या प्रसंगी नैसर्गिक मानव अधिकार सुरक्षा फोरमचे राष्ट्रीय अध्यक्ष श्री. गोरख दिलीप देवरे, उत्तर महाराष्ट्र अध्यक्ष प्रा. प्रफुल सिताराम पाटील, आमदार श्री. राघवेंद्र भदाणे यांच्यासह संस्थेचे पदाधिकारी मोठ्या संख्येने उपस्थित होते.
सौ. मनीषा आव्हाड या केवळ शिक्षण क्षेत्रातच नव्हे, तर सामाजिक कार्यातही सक्रिय असून विविध माध्यमातून गरजू घटकांना मदत करत समाजातील आपुलकीची नाती जपण्याचे कार्य करत आहेत. त्यांच्या या उल्लेखनीय कार्यामुळे त्यांना हा सन्मान बहाल करण्यात आला असून परिसरातून त्यांचे अभिनंदन होत आहे.
