उदगीर (प्रतिनिधी) : उन्नत भारत अभियानाच्या अंतर्गत मौजे हैबतपूर येथे पशुरोग निदान व उपचार शिबीर शनिवार, दि. २८ मार्च २०२६ रोजी उत्साहात पार पडले. हा उपक्रम Maharashtra Animal and Fishery Sciences University अंतर्गत मत्स्यविज्ञान महाविद्यालय, उदगीर व पशुवैद्यकीय महाविद्यालय उदगीर यांच्या संयुक्त विद्यमाने आयोजित करण्यात आला होता.
या शिबिरात एकूण १५८ जनावरांची विविध आजारांसाठी तपासणी करण्यात आली. जंतनाशन, फवारणी, आजारी जनावरांची तपासणी, वंध्यत्व निवारण तसेच शस्त्रक्रिया आदी उपचार करण्यात आले. याशिवाय गोवंश व म्हैसवर्गीय जनावरांना लाळ्या-खुरकूत रोगावरील लसीकरणही करण्यात आले.
शिबिरात पशुवैद्यकीय महाविद्यालयातून डॉ. सुरेश घोके (भिषकशास्त्र विभाग) व डॉ. स्नेहल रामटेके (रोग प्रसूतिशास्त्र विभाग) यांनी मार्गदर्शन व उपचार केले. तसेच मत्स्यविज्ञान महाविद्यालयातून डॉ. सोमनाथ यादव, डॉ. संतोष कुंजीर, डॉ. मिलिंद गिरकर, डॉ. जयश्री मठपती, डॉ. सागर सातकर यांच्यासह प्राध्यापक व विद्यार्थी मोठ्या संख्येने उपस्थित होते.
या शिबिरात डॉ. वंशिका कांबळे (स्नातकोत्तर) तसेच अंतिम वर्षातील विद्यार्थ्यांनी सक्रिय सहभाग घेतला. शिबिराच्या यशस्वी आयोजनासाठी श्री. रजनीकांत सोमवंशी, श्री. गणेश तेलंग व श्री. राम तळेगावे यांनी विशेष परिश्रम घेतले. कार्यक्रमाचे समन्वयन डॉ. संतोष कुंजीर यांनी केले.
या उपक्रमामुळे स्थानिक पशुपालकांना मोठा दिलासा मिळाला असून, पशुधनाच्या आरोग्याबाबत जनजागृती होण्यासही मदत झाली आहे.
