शहादा, दि. २८ (प्रतिनिधी) : शहादा येथील शासकीय औद्योगिक प्रशिक्षण संस्था (आयटीआय) येथे भोई समाज रोजगार मेळावा उत्साहात पार पडला असून, एकूण ३१ पात्र उमेदवारांना विविध कंपन्यांकडून नियुक्तीपत्रांचे वाटप करण्यात आले.
हा मेळावा कौशल्य विकास रोजगार व उद्योजकता मार्गदर्शन केंद्र नंदुरबार, Akhil Bharatiya Bhoi Samaj Seva Sanstha, भोई समाज कल्याणकारी मंच, स्व. विपुल खेडकर सामाजिक व शैक्षणिक फाउंडेशन आणि शासकीय आयटीआय शहादा यांच्या संयुक्त विद्यमाने आयोजित करण्यात आला होता.
कार्यक्रमाची सुरुवात मान्यवरांच्या हस्ते प्रतिमा पूजन व दीपप्रज्वलनाने झाली. यावेळी धुळे जिल्हाध्यक्ष भाईदास भोई, प्रा. महेंद्र खेडकर, सहाय्यक आयुक्त शिवदास कोळी, सी.पी. चौधरी, सुधीर शिरसाठ, आर.डी. मोरे, संजय खेडकर तसेच स्थानिक प्राचार्य एस.आर. बागुल आदी मान्यवर उपस्थित होते.
मेळाव्याचे प्रास्ताविक करताना प्रा. महेंद्र खेडकर यांनी उपक्रमाचा उद्देश स्पष्ट केला, तर सुधीर शिरसाठ व शिवदास कोळी यांनी विद्यार्थ्यांना विविध कंपन्यांमधील रोजगार संधी व आवश्यक पात्रतेबाबत मार्गदर्शन केले.
अध्यक्षीय भाषणात Supadu Khedkar यांनी युवकांना मार्गदर्शन करताना सांगितले की, “पारंपारिक व्यवसायांसोबत आधुनिकतेची कास धरणे काळाची गरज आहे. स्पर्धेच्या युगात मिळालेल्या संधीचा योग्य उपयोग करून युवकांनी आपले भविष्य घडवावे.”
या मेळाव्यास एकूण ११० विद्यार्थ्यांनी सहभाग नोंदवला होता. त्यापैकी भोई समाजातील ११ व आयटीआय शहादा येथील २० अशा एकूण ३१ विद्यार्थ्यांची निवड करून त्यांना नियुक्तीपत्र देण्यात आले.
कार्यक्रमाच्या यशस्वीतेसाठी विविध पदाधिकारी व कर्मचाऱ्यांनी परिश्रम घेतले. सूत्रसंचालन संजय खेडकर यांनी केले, तर आभार प्रदर्शन आर.डी. मोरे यांनी मानले.
