शहादा, दि. २८ (प्रतिनिधी) : शहादा शहर व तालुक्यातील सर्वसामान्य तसेच आदिवासी समाजातील रुग्णांना आपत्कालीन परिस्थितीत रुग्णवाहिका मिळवण्यासाठी होणारी अडचण आता दूर होणार आहे. Shiv Sena च्या माध्यमातून आमदार Chandrakant Raghuwanshi यांनी शहादा परिसरासाठी अद्ययावत रुग्णवाहिका उपलब्ध करून दिली आहे.
नंदुरबार येथे आयोजित कार्यक्रमात आमदार रघुवंशी यांच्या हस्ते ही रुग्णवाहिका शहादा येथील शिवसेना पदाधिकाऱ्यांकडे सुपूर्द करण्यात आली. विधानपरिषदेवर निवड झाल्यानंतर स्थानिक शिवसैनिकांनी रुग्णवाहिकेची मागणी केली होती. ग्रामीण व दुर्गम भागातील रुग्णांना वेळेवर उपचार मिळावेत या उद्देशाने त्यांनी तत्काळ आश्वासन देत ही सुविधा उपलब्ध करून दिली.
या लोकार्पण सोहळ्यास माजी जिल्हा परिषद अध्यक्ष अॅड. आबा पाटील, हस्ती बँकेचे अध्यक्ष ईश्वर जैन, बांधकाम सभापती देवेंद्र जैन, रोहिदास राठोड, अनिल पाटील, दुर्गेश वैष्णव, पप्पू गिरासे आदी मान्यवर उपस्थित होते.
शहादा तालुक्याच्या वतीने तालुका प्रमुख मनलेश जायसवाल, ज्येष्ठ नेते सुपडू खेडकर, युवा सेना उपजिल्हा प्रमुख राजरत्न बिरारे, हेमंत सूर्यवंशी, गणेश माळी, धनराज जायसवाल व लखीचंद जायसवाल यांनी रुग्णवाहिका स्वीकारली. यावेळी मनलेश जायसवाल यांनी आमदार रघुवंशी यांचे आभार मानले.
ही रुग्णवाहिका सेवा ‘ना नफा-ना तोटा’ या तत्त्वावर २४ तास उपलब्ध राहणार असून, तातडीच्या मदतीसाठी रुग्णांनी शिवसेना संपर्क कार्यालयाशी किंवा संबंधित पदाधिकाऱ्यांशी संपर्क साधण्याचे आवाहन करण्यात आले आहे.
