माहूर | प्रतिनिधी :
माहूर तालुक्यासह शहरात गेल्या काही दिवसांपासून गॅस, पेट्रोल आणि डिझेल टंचाईच्या अफवांनी नागरिकांची धावपळ उडवली होती. त्यातच आता लॉकडाऊन लागणार असल्याची नवीन अफवा सोशल मीडियावर वेगाने पसरत आहे.
व्हॉट्सअॅप, इंस्टाग्राम आणि फेसबुकवर फिरणाऱ्या मेसेजमुळे नागरिकांमध्ये भीतीचे वातावरण निर्माण झाले असून, काही ठिकाणी पुन्हा एकदा साठवणुकीकडे लोकांचा कल वाढताना दिसत आहे. किराणा दुकाने, पेट्रोल पंप आणि गॅस एजन्सींवर अचानक वाढलेली गर्दीमुळे परिस्थिती अधिकच गोंधळाची झाली आहे.
दरम्यान, प्रशासनाकडून कोणतीही अधिकृत घोषणा करण्यात आलेली नसतानाही अफवांमुळे नागरिकांमध्ये संभ्रमाचे वातावरण निर्माण झाले आहे. अशा परिस्थितीत अफवांवर विश्वास न ठेवता अधिकृत माहितीवरच विश्वास ठेवावा, घाईगडबडीत खरेदी करू नये आणि अफवा पसरवणे टाळावे, असे आवाहन करण्यात येत आहे.
