२९ मार्च ते ५ एप्रिलदरम्यान विविध कीर्तन-प्रवचनांचा आध्यात्मिक सोहळा
अहमदपूर | प्रतिनिधी :
तालुक्यातील मौजे दगडवाडी (ता. अहमदपूर, जि. लातूर) येथे प्रतिवर्षाप्रमाणे यंदाही अखंड हरिनाम सप्ताहाचे भव्य आयोजन करण्यात आले आहे. चैत्र शुद्ध ११, रविवार दि. २९ मार्च २०२६ रोजी सप्ताहाची सुरुवात होणार असून, चैत्र कृ. ३, रविवार दि. ५ एप्रिल २०२६ रोजी सांगता होणार आहे.
या सप्ताहाची सुरुवात दि. २९ मार्च रोजी सकाळी ९ ते ११ या वेळेत हभप बापूदेव महाराज बेलगावकर यांच्या कीर्तनाने होणार आहे. त्यानंतर दररोज सकाळी ६ ते १० ज्ञानेश्वरी पारायण, १० ते १ गाथा-हरिपाठ, १ ते ३ रामायण प्रवचन, ३ ते ६ अन्नदान पंगत, ६ ते ८ धूपारती व भजन, तर रात्री ९ ते ११ कीर्तन आणि त्यानंतर रात्रभर जागरणाचा कार्यक्रम होणार आहे.
सप्ताहादरम्यान विविध मान्यवर कीर्तनकारांची उपस्थिती लाभणार असून, त्यात व्यंकट महाराज केंद्रे (हाडोळी), बंडोपंत महाराज कोद्रीकर, कृष्णा महाराज धानोरा, दत्ता महाराज बोर्डेकर, नारायण महाराज शास्त्री केंद्रे, माऊली महाराज शिंदगीकर आणि कृष्णा महाराज गुट्टे (आळंदी) यांचा समावेश आहे.
दि. २ एप्रिल रोजी हनुमान जयंतीनिमित्त पहाटे ४ ते ६ या वेळेत रामकिसन गुट्टे गुरुजी महाराज यांचे विशेष कीर्तन होणार आहे.
सप्ताहाची सांगता दि. ५ एप्रिल रोजी दुपारी २ ते ४ या वेळेत ज्ञानोबा माऊली महाराज अरबुजवाडीकर यांच्या पूजेच्या कीर्तनाने होईल. त्यानंतर महाप्रसादाचे आयोजन करण्यात आले आहे. रात्री ज्ञानेश्वर महाराज घुले (नवाबवाडी) यांचे कीर्तन व भारूडाचा कार्यक्रम होणार असून, पहाटे विनोदाचार्य व्यंकट महाराज गित्ते (दगडवाडीकर) यांच्या काल्याच्या कीर्तनाने आणि मंदिर प्रदक्षिणा व आरतीने सप्ताहाची सांगता करण्यात येईल.
या अखंड हरिनाम सप्ताहाचा लाभ घेण्यासाठी परिसरातील सर्व भाविकांनी मोठ्या संख्येने उपस्थित राहावे, असे आवाहन समस्त गावकरी मंडळ, दगडवाडी यांच्या वतीने करण्यात आले आहे.
