मारेगाव | प्रतिनिधी :
मारेगाव-वणी महामार्गालगत असलेल्या एका पेट्रोल पंपावर नागरिकांची मोठी गर्दी होत असून, नियमभंग आणि दुर्व्यवहाराच्या आरोपांमुळे नागरिकांमध्ये तीव्र संताप निर्माण झाला आहे. सध्या इंधन टंचाईच्या अफवांच्या पार्श्वभूमीवर संपूर्ण तालुक्यात तणावाचे वातावरण असताना या प्रकाराने अधिकच गोंधळ निर्माण केला आहे.
जिल्हाधिकाऱ्यांनी पेट्रोल, डिझेल व गॅस साठवणुकीवर बंदी घालण्याचे स्पष्ट आदेश दिले असतानाही संबंधित पंपावर काही नागरिकांकडून बॅरलमध्ये डिझेल भरण्यास परवानगी दिली जात असल्याचा आरोप आहे. विशेष म्हणजे ही गर्दी रात्री उशिरापर्यंत सुरू असल्याचेही सांगण्यात येत आहे.
दरम्यान, एका मोटरसायकल चालकाने आपल्या कुटुंबासह येऊन बाटलीत ५० ते १०० रुपयांचे पेट्रोल देण्याची विनंती केली असता, पंप मालकाने नकार दिल्याची घटना समोर आली आहे. यावर संबंधित नागरिकाने “सामान्यांना पेट्रोल नाकारले जाते, मात्र काहींना बॅरलने डिझेल कसे दिले जाते?” असा सवाल उपस्थित केला. यावेळी पंप मालकाकडून समाधानकारक उत्तर न मिळाल्याने नागरिकांमध्ये नाराजी वाढली.
या संपूर्ण प्रकारामुळे नागरिकांमध्ये असंतोष वाढत असून, प्रशासनाने तातडीने या प्रकरणाची दखल घेऊन योग्य ती कारवाई करावी, अशी मागणी जोर धरत आहे.
