सांगली | प्रतिनिधी :
जत तालुक्यातील जिल्हा परिषद मॉडेल स्कूल क्रमांक १ या शाळेची भारतरत्न डॉ. बाबासाहेब आंबेडकर आदर्श शाळा योजनेअंतर्गत निवड करण्यात आली आहे. ग्रामीण भागातील जिल्हा परिषद शाळांचा दर्जा उंचावून त्यांना खाजगी शाळांच्या तोडीस तोड बनवण्याचा या योजनेचा मुख्य उद्देश आहे.
या निवडीमुळे शाळेत पायाभूत सुविधांचा मोठ्या प्रमाणावर विकास होणार असून, विद्यार्थ्यांसाठी स्वतंत्र व स्वच्छ स्वच्छतागृहे, शुद्ध पिण्याच्या पाण्याची अत्याधुनिक व्यवस्था (RO/UV) तसेच डिजिटल वर्गखोल्यांची उभारणी करण्यात येणार आहे.
तसेच विद्यार्थ्यांसाठी आयसीटी (ICT) लॅब व अद्ययावत संगणक सुविधा उपलब्ध करून दिली जाणार आहे. शैक्षणिक गुणवत्ता सुधारण्यासाठी विशेष कृती आराखडा राबवून शिक्षकांना प्रशिक्षण दिले जाणार आहे.
विद्यार्थ्यांच्या सर्वांगीण विकासासाठी खेळाचे मैदान, मुलींसाठी ‘पिंक रूम’ तसेच क्रीडा प्रबोधिनी उभारण्याचेही नियोजन करण्यात आले आहे.
या योजनेत शाळेची निवड झाल्यामुळे जत तालुक्यातील विद्यार्थ्यांना आधुनिक, सुसज्ज व गुणवत्तापूर्ण शिक्षण मिळण्याचा मार्ग मोकळा झाला असून, परिसरात समाधान व्यक्त केले जात आहे.
