किनगाव | प्रतिनिधी :
आध्यात्मिक परंपरेचा वारसा जपत श्री क्षेत्र कोळवाडी आणि किनगाव येथे ‘कावड-काठी यात्रा उत्सव-२०२६’ मोठ्या उत्साहात साजरा होत असून, या उत्सवाचा मुख्य आकर्षण असलेला कावड-काठी व भगवान भोलेनाथांचा विवाह सोहळा आज, सोमवार दि. ३० मार्च रोजी किनगाव येथील ऐतिहासिक महादेव मंदिरात पार पडणार आहे.
या उत्सवाची सुरुवात १९ मार्च रोजी चैत्र शुद्ध प्रतिपदा अर्थात गुढीपाडव्याच्या दिवशी करण्यात आली होती. हनुमान मंदिरात गुढीसोबत कावड-काठीची विधीवत पूजा करून ती उभारण्यात आली. विशेष म्हणजे, कोळवाडी येथील शिवभक्तांनी गेल्या १२ दिवसांपासून कडक उपवास पाळला असून, भोलेनाथांसोबत कावड-काठीचा विवाह संपन्न झाल्यानंतरच या उपवासाची सांगता केली जाणार आहे.
रविवार दि. २९ मार्च रोजी चैत्र शुद्ध एकादशी निमित्त कोळवाडी येथे कावड-काठीची महापूजा, आरती व ढोल-ताशांच्या गजरात जल्लोष साजरा करण्यात आला. आज द्वादशीच्या दिवशी किनगाव येथे मुख्य विवाह सोहळा पार पडणार आहे.
या यात्रेची सांगता हनुमान जयंतीच्या दिवशी सूर्योदयाच्या वेळी गुलाल उधळून व कावड-काठी पूजनाने करण्यात येणार आहे.
या मंगलमय सोहळ्याचे साक्षीदार होण्यासाठी तसेच भगवान भोलेनाथ व शिव-पार्वतीच्या दर्शनासाठी पंचक्रोशीतील भाविकांनी मोठ्या संख्येने उपस्थित राहावे, असे आवाहन समस्त कोळवाडी ग्रामस्थ मंडळ व श्री महादेव मंदिर व्यवस्थापन समिती, किनगाव यांच्या वतीने करण्यात आले आहे.
