उमरगा | प्रतिनिधी :
तोयकांना इंडिया वादो रियू कराटे डो फेडेरेशन (तोयकांना इंटरनॅशनल कराटे ऑर्गनायझेशन, ऑस्ट्रेलिया संलग्न) यांच्या वतीने आयोजित करण्यात आलेली कराटे बेल्ट ग्रेडेशन परीक्षा जिल्हा परिषद हायस्कूल, उमरगा येथे रविवार दि. १५ मार्च रोजी उत्साहात पार पडली.
या परीक्षेमध्ये कराटे विद्यार्थ्यांनी उत्कृष्ट कौशल्य, शिस्त आणि आत्मविश्वासाचे प्रदर्शन करत यशस्वीरित्या आपापले बेल्ट व प्रमाणपत्र प्राप्त केले.
कार्यक्रमाच्या अध्यक्षस्थानी रत्नदीप वाकडे होते, तर प्रमुख पाहुणे म्हणून आनंद चौधरी उपस्थित होते. यावेळी धैर्यशील जाधव, सुनील बायस, अमोल कुंभार, मंजुनाथ हालसे, सूर्यकांत स्वामी, विष्णू भांगे तसेच पुष्पाताई गव्हाणे, वैशाली वाघमारे यांच्यासह मोठ्या संख्येने पालकवर्ग उपस्थित होता.
या बेल्ट परीक्षेसाठी मनोज पतंगे यांनी परीक्षक म्हणून काम पाहिले. तोयकांना इंडिया वादो रियू कराटे डो फेडरेशनचे सचिव महंमदरफी शेख यांच्या मार्गदर्शनाखाली ही परीक्षा यशस्वीरित्या पार पडली. यावेळी त्यांनी विद्यार्थ्यांना कराटेमधील शिस्त, आत्मसंरक्षण आणि सातत्यपूर्ण सरावाचे महत्त्व पटवून देत अधिक मेहनत घेण्याचे आवाहन केले.
कराटे हे केवळ एक खेळ नसून शिस्त, आत्मसंरक्षण आणि आत्मविश्वास देणारी जीवनशैली असल्याचे यावेळी नमूद करण्यात आले. विद्यार्थ्यांनी भविष्यातही सातत्य राखून ब्लॅक बेल्टपर्यंत पोहोचावे, अशी अपेक्षा व्यक्त करण्यात आली.
या परीक्षेत डॉ. रामानुजन इंग्लिश स्कूल, जिल्हा परिषद हायस्कूल, छत्रपती शिवाजी महाविद्यालय, श्री महात्मा बसेश्वर विद्यालय, शरणप्पा मलंग विद्यालय (उमरगा) तसेच गुरुकुल प्री-प्रायमरी इंग्लिश स्कूल (मुरूम) येथील विद्यार्थ्यांनी उत्साहात सहभाग नोंदवला.
