आजरा (प्रतिनिधी) :
जिल्हा वार्षिक योजनेतील विशेष घटक योजनेअंतर्गत अनुसूचित जाती व नवबुद्ध लाभार्थ्यांसाठी पशुसंवर्धन विषयावरील विशेष प्रशिक्षण कार्यक्रमाचे आयोजन करण्यात आले होते. या कार्यक्रमाच्या माध्यमातून तालुक्यातील पशुपालकांना आधुनिक पशुपालन व विविध शासकीय योजनांची सविस्तर माहिती देण्यात आली.
या कार्यक्रमाला जयश्री गाडे, यशोदा पोवार, शिरीष देसाई, विकास चोथे आणि समीर पारदे यांची प्रमुख उपस्थिती होती.
तज्ज्ञांचे मार्गदर्शन :
कार्यक्रमाचे मुख्य व्याख्याते म्हणून डॉ. अविनाश जोशी (गोकुळ दूध संघाचे निवृत्त सहाय्यक व्यवस्थापक) यांनी पशुपालकांना मार्गदर्शन केले. त्यांनी दुग्धव्यवसायातील सुधारित पद्धती व व्यवस्थापनाबाबत मोलाचे सल्ले दिले. तसेच डॉ. मुत्तेफोड (सहाय्यक आयुक्त, पशुवैद्यकीय चिकीत्सालय, आजरा) यांनी ‘मुख्यमंत्री पशुधन उद्योजकता योजना’ विषयी सविस्तर माहिती देत लाभार्थ्यांनी या योजनेचा लाभ घ्यावा, असे आवाहन केले.
यावेळी गटविकास अधिकारी सावंत व सहाय्यक गटविकास अधिकारी दिनेश शेटे यांनीही पशुपालकांना मार्गदर्शन करून प्रोत्साहित केले.
कार्यक्रमाची सांगता :
कार्यक्रमाचे प्रास्ताविक डॉ. पी. डी. ढेकळे (पशुधन विकास अधिकारी) यांनी केले, तर आभार संतोष कांबळे (पशुधन पर्यवेक्षक) यांनी मानले.
या प्रशिक्षण शिबिराला तालुक्यातील लाभार्थी पशुपालक मोठ्या संख्येने उपस्थित होते.
