आजरा :
आजरा तालुक्यात १ हजार हेक्टर क्षेत्रावर भाताचे तरवा पेरणी व रोप लागण यांत्रिकी पद्धतीने केली जाणार आहे. यासाठी आजरा तालुका शेतकरी विकास मंडळाने ७ गावांसाठी ७ यांत्रिकी मशीनची ऑर्डर नागालँड व हरियाणा राज्यात दिली आहे.
या उपक्रमामुळे भात रोप लागणीवेळी होणाऱ्या मजुरांच्या तुटवड्याला प्रभावी पर्याय उपलब्ध होणार असल्याचे सांगितले जात आहे.
आजरा तालुक्यात मुबलक पाऊस व अनुकूल हवामानामुळे भाताचे सर्वाधिक उत्पादन घेतले जाते, मात्र रोजगारासाठी तरुणांचे शहराकडे स्थलांतर वाढल्याने शेतीकडे ओढा कमी झाला असून मजुरांचा तुटवडा जाणवत आहे. त्यामुळे सुमारे २५ टक्के क्षेत्र ओसाड पडले आहे.
ही परिस्थिती लक्षात घेऊन मंडळाने तरवा पेरणी मशीन चेन्नई येथून तर भात लागण मशीन नागालँड व हरियाणा येथून आणण्याचा निर्णय घेतला असून त्यासाठीची रक्कमही भरली आहे. पहिल्या टप्प्यात दोन्ही प्रकारची ७ मशीन उपलब्ध होणार आहेत.
शेतकऱ्यांना प्रशिक्षण :
एप्रिलच्या पहिल्या आठवड्यात शेतकऱ्यांना यंत्राद्वारे भात पेरणी व रोप लागण याचे प्रशिक्षण दिले जाणार आहे. यामध्ये
- भात रोपे तयार करणे
- यंत्र चालवणे व हाताळणे
- तरवा तयार करून यंत्राने पेरणी करणे
- रोप लागण मशीनची प्रात्यक्षिके
यांचा समावेश असेल. प्रत्येक गावातून १० शेतकऱ्यांना प्रशिक्षणासाठी प्रवेश दिला जाणार असल्याची माहिती मंडळाचे अध्यक्ष संभाजी सावंत यांनी दिली.
९ हजार १०० हेक्टर क्षेत्र :
तालुक्यात धरणांमुळे पाणीसाठा वाढल्याने काही प्रमाणात उसाचे क्षेत्र वाढले असले तरी सध्या ९ हजार १०० हेक्टर क्षेत्रावर भाताचे पीक घेतले जाते. त्यापैकी ५५०० हेक्टर क्षेत्रावर भात रोप लागण केली जाते.
पहिल्याच वर्षी १ हजार हेक्टर क्षेत्रावर यांत्रिकी पद्धतीने भात रोप लागण करण्याचे नियोजन करण्यात आले आहे, त्यामुळे शेतीत आधुनिक तंत्रज्ञानाचा वापर वाढण्यास मदत होणार आहे.
