उदगीर (प्रतिनिधी) :
३५ व्या सब-ज्युनिअर राष्ट्रीय कबड्डी स्पर्धेसाठी तांत्रिक अधिकारी म्हणून लातूरचे शिवाजीराव बापूराव कोंडमगिरे यांची निवड करण्यात आली आहे, त्यामुळे लातूर जिल्ह्याच्या शिरपेचात मानाचा तुरा रोवला गेला आहे.
ही स्पर्धा २ ते ४ एप्रिल २०२६ दरम्यान पुणे जिल्ह्यातील आळंदी येथील संत ज्ञानेश्वर विद्यालय व ज्युनिअर कॉलेजच्या प्रांगणात पार पडणार आहे. अमॅच्युअर कबड्डी फाउंडेशन ऑफ इंडिया, महाराष्ट्र व पुणे यांच्या संयुक्त विद्यमाने या स्पर्धेचे आयोजन करण्यात आले आहे.
बहुआयामी व्यक्तिमत्त्व :
शिवाजीराव कोंडमगिरे हे राष्ट्रीय स्तरावरील कबड्डी खेळाडू असून राज्यस्तरीय पंच म्हणूनही त्यांची ओळख आहे. तसेच ते राज्य परिवहन महामंडळ (एसटी) लातूर विभागात सहाय्यक पदावर कार्यरत असून एसटी कष्टकरी जनसंघाचे विभागीय सचिव म्हणूनही सक्रिय आहेत.
कौतुकाचा वर्षाव :
त्यांच्या या निवडीमुळे एसटी महामंडळातील अधिकारी, कर्मचारी, क्रीडा क्षेत्रातील मान्यवर तसेच क्रीडा शिक्षकांकडून त्यांचे अभिनंदन करण्यात येत आहे.
या स्पर्धेत तांत्रिक जबाबदारी सांभाळताना त्यांच्या अनुभवाचा मोठा फायदा खेळाडूंना व संयोजकांना होईल, असा विश्वास व्यक्त केला जात आहे.
