📝 आजरा (प्रतिनिधी) :
कोल्हापूर जिल्हा शिक्षक समितीचे जिल्हाध्यक्ष प्रमोद तौंदकर यांनी नुकताच आजरा तालुक्याचा दौरा करत शिक्षकांच्या विविध प्रलंबित प्रश्नांवर सखोल चर्चा केली. यावेळी जिल्हा स्तरावरील प्रश्न तातडीने मार्गी लावण्याचे आश्वासन त्यांनी दिले.
या बैठकीत शिक्षकांचे वैयक्तिक प्रश्न, जिल्हा स्तरावरील अडचणी तसेच राज्य स्तरावर प्रलंबित असलेल्या विविध विषयांवर सविस्तर ऊहापोह करण्यात आला. तौंदकर यांनी शिक्षकांच्या मागण्या व तक्रारी ऐकून प्रशासनाशी संबंधित प्रश्न लवकरात लवकर सोडवण्याची ग्वाही दिली.
तसेच येत्या ११ तारखेला होणाऱ्या जिल्हा पुरस्कार सोहळ्याबाबतही बैठकीत नियोजन करण्यात आले. या कार्यक्रमात आजरा तालुक्यातील शिक्षकांचा सक्रिय सहभाग राहील, असा निर्धार व्यक्त करण्यात आला.
बैठकीच्या अध्यक्षस्थानी जिल्हाध्यक्ष प्रमोद तौंदकर होते. शिक्षक नेते सुनील शिंदे यांनी विविध स्तरांवरील प्रश्नांचा आढावा मांडला, तर सरचिटणीस बळीराम तानवडे यांनी स्वागत केले.
यावेळी बाळासाहेब शिंत्रे, शिवाजीराव बोलके, सारिका पाटील, नीलिमा गोवेकर आदी पदाधिकारी उपस्थित होते. तालुक्यातील मोठ्या संख्येने शिक्षकांनी या बैठकीत सहभाग घेतला. कार्यक्रमाचे आभार प्रदर्शन तालुकाध्यक्ष एकनाथ गिलबिले यांनी केले.
