आजरा (प्रतिनिधी):
कानोली (ता. आजरा) येथील दूध उत्पादक महिला सभासद सौ. माया सतीश पाटील यांच्या कुटुंबावर ओढवलेल्या नैसर्गिक आपत्तीची दखल घेत गोकुळ दूध संघाचे संचालक चेतन अरुण नरके यांनी त्यांच्या घरी भेट देत मदतीचा हात पुढे केला. सर्पदंशामुळे पशुधन गमावलेल्या या कुटुंबाला त्यांनी १० हजार रुपयांची वैयक्तिक आर्थिक मदत दिली असून, नवीन म्हैस खरेदीसाठी ‘गोकुळ’कडूनही सहकार्य मिळवून देण्याचे आश्वासन दिले.
माहितीनुसार, महिन्याच्या सुरुवातीला पाटील यांच्या गोठ्यात सर्पदंशामुळे दुभती म्हैस, एक बकरी आणि कोंबडी दगावली होती. या घटनेत कुटुंबाचे सुमारे सव्वा लाख रुपयांचे नुकसान झाले होते. शेती व पशुधनावर उदरनिर्वाह असलेल्या या कुटुंबावर मोठे आर्थिक संकट ओढवले होते.
ही बाब समोर आल्यानंतर चेतन नरके यांनी तात्काळ कानोली येथे जाऊन कुटुंबाची विचारपूस केली. “संकटाच्या काळात आम्ही तुमच्या पाठीशी आहोत,” असा दिलासा देत त्यांनी आर्थिक मदत सुपूर्द केली. या मदतीमुळे पाटील कुटुंबाला मोठा आधार मिळाला असून त्यांनी कृतज्ञता व्यक्त केली.
उपस्थित मान्यवर :
• सौ. सुषमा पाटील (सरपंच, कानोली)
• बाजीराव पाटील (चेअरमन, गजानन दूध संस्था)
• दिलीप पाटील (सोसायटी चेअरमन)
• सुभाष पाटील, अनिल पाटील, चित्रा पाटील व ग्रामस्थ उपस्थित
या संकटकाळात लोकप्रतिनिधींकडून मिळालेल्या तत्पर मदतीचे आजरा तालुक्यात सर्वत्र कौतुक होत आहे.
