आजरा (प्रतिनिधी):
सहकार क्षेत्रातील अग्रगण्य संस्था असलेल्या आजरा अर्बन को-ऑपरेटिव्ह बँक लि. (मल्टी-स्टेट) या बँकेने आर्थिक वर्ष २०२५-२०२६ मध्ये सर्वच आर्थिक निकषांवर उल्लेखनीय कामगिरी करत विक्रमी वाढ नोंदवली आहे. बँकेच्या ताज्या अहवालानुसार ठेवी, कर्जवाटप आणि नफ्यात लक्षणीय वाढ झाली असून मालमत्ता गुणवत्तेतही सुधारणा झाली आहे.
गेल्या आर्थिक वर्षात बँकेचा एकूण व्यवसाय १,६८,१५०.७१ लाख रुपये होता, जो यावर्षी वाढून १,९५,७४०.०८ लाख रुपयांपर्यंत पोहोचला आहे. ठेवींमध्ये १३,६३२.५४ लाखांची वाढ होऊन एकूण ठेवी १,१६,१९९.६२ लाख रुपयांवर पोहोचल्या आहेत.
कर्जवाटपातही भरीव वाढ :
• कर्जवाटप ६५,५८३.६३ लाखांवरून वाढून ७९,५४०.४६ लाख रुपये
• सीडी रेशो ६४% वरून वाढून ६८%
बँकेच्या कार्यक्षम कर्ज धोरणामुळे कर्जवाटपातही मोठी झेप घेतली असून सीडी रेशोमध्ये वाढ झाल्याचे दिसून येते.
नफा वाढला, एनपीएत घट :
• करपूर्व नफा ८१०.०३ लाखांवरून वाढून १,१३५.३५ लाख रुपये
• ग्रॉस एनपीए ३.११% वरून घटून २.२०%
बँकेने वसुली प्रक्रियेवर विशेष भर दिल्याने एनपीएमध्ये लक्षणीय घट झाली असून आर्थिक सक्षमीकरणाचा हा महत्त्वाचा टप्पा मानला जात आहे.
या यशाबद्दल बँकेचे अध्यक्ष मा. अशोक आण्णा चराटी यांनी समाधान व्यक्त करत या प्रगतीचे श्रेय बँकेचे सभासद, ग्राहक, हितचिंतक, मुख्य कार्यकारी अधिकारी तसेच सर्व कर्मचारी यांच्या एकत्रित प्रयत्नांना दिले. भविष्यातही बँकेची ही प्रगती कायम राहील, असा विश्वास त्यांनी व्यक्त केला.
