आजरा | प्रतिनिधी : Autism Spectrum Disorder (स्वमग्नता) या विकाराबाबत समाजात जागृती निर्माण करण्यासाठी World Autism Awareness Day निमित्त कोल्हापूर येथील कसबा बावडा येथील सेवा रुग्णालयात विशेष मार्गदर्शन कार्यशाळा आयोजित करण्यात आली. जिल्हा शिघ्र हस्तक्षेप केंद्र (DEIC), राष्ट्रीय बाल स्वास्थ्य कार्यक्रम (RBSK) आणि कोल्हापूर पिडीयाट्रिक असोसिएशन यांच्या संयुक्त विद्यमाने हा उपक्रम पार पडला.
कार्यशाळेत प्रख्यात डेव्हलपमेंटल आणि बिहेविअरल पेडिअट्रिशिअन डॉ. काश्मिरी बडबडे यांनी वैद्यकीय अधिकारी व कर्मचाऱ्यांना सखोल मार्गदर्शन केले. स्वमग्नतेची लक्षणे ओळखणे, वेळीच निदान करणे आणि योग्य उपचार पद्धतींचा अवलंब करण्याचे महत्त्व त्यांनी अधोरेखित केले. तसेच RBSK अंतर्गत कार्यरत वैद्यकीय अधिकाऱ्यांच्या शंकांचे समाधानकारक निरसनही करण्यात आले.
कार्यक्रमाच्या अध्यक्षस्थानी अतिरिक्त जिल्हा शल्य चिकित्सक डॉ. सरिता थोरात होत्या. यावेळी कोल्हापूर बालरोग संघटनेचे अध्यक्ष डॉ. विजय गावडे, सचिव डॉ. मिलींद सदावर्ते, सहसचिव डॉ. भूषण मिरजे तसेच जिल्हा शल्य चिकित्सक डॉ. प्रशांत वाडीकर उपस्थित होते.
कार्यक्रमाच्या यशस्वीतेसाठी वैद्यकीय अधिक्षक डॉ. निलिमा पाटील, बालरोग तज्ज्ञ डॉ. बाबासाहेब थोरात, डॉ. आगतराव यादव, डॉ. अजय शिंदे, व्यवस्थापक मनोरमा सुंजी आणि DEIC व RBSK च्या संपूर्ण टीमने परिश्रम घेतले.
या उपक्रमामुळे जिल्ह्यातील स्वमग्न बालकांच्या उपचारात आधुनिक पद्धतींचा वापर वाढण्यास मदत होणार असून, ग्रामीण भागातील रुग्णांना त्याचा निश्चितच लाभ होणार आहे.
