आंबेगाव (पुणे): प्रतिनिधी
तालुक्यातील मापोली येथे श्री हनुमान जन्मोत्सवाचे औचित्य साधून आयोजित करण्यात आलेल्या १० व्या अखंड हरिनाम सप्ताहाची सांगता अत्यंत उत्साहात आणि भक्तीमय वातावरणात झाली. शुक्रवार, दिनांक ०३ एप्रिल २०२६ रोजी काल्याच्या कीर्तनाने आणि महाप्रसादाने या सोहळ्याची सांगता करण्यात आली.
बुधवार, ०१ एप्रिलपासून सुरू झालेल्या या सप्ताहात दररोज विविध धार्मिक कार्यक्रमांचे आयोजन करण्यात आले होते. पहाटे काकडा भजन, विष्णुपूजन, दुपारी प्रवचन, सायंकाळी हरिपाठ आणि रात्री हरिकीर्तन अशा विविध कार्यक्रमांमुळे संपूर्ण परिसर भक्तीमय वातावरणात न्हाऊन निघाला होता.
सप्ताहाच्या शेवटच्या दिवशी पहाटे काकडा भजनानंतर सकाळी ९ ते ११ या वेळेत ह.भ.प. भास्कर महाराज जगदाळे यांचे काल्याचे कीर्तन पार पडले. त्यांच्या कीर्तनाने उपस्थित भाविक मंत्रमुग्ध झाले. त्यानंतर दुपारी १२ वाजता महाप्रसादाचे आयोजन करण्यात आले.
या सप्ताहात मापोलीसह परिसरातील तसेच मुंबई आणि पुणे येथील भाविकांनी मोठ्या संख्येने उपस्थिती लावली. सप्ताहाच्या यशस्वीतेसाठी समस्त ग्रामस्थ, हनुमान तरुण मंडळ आणि हनुमान काकडा मंडळाच्या कार्यकर्त्यांनी विशेष परिश्रम घेतले.
यावेळी विविध मान्यवरांची उपस्थिती लाभली असून, श्री हनुमान जन्मोत्सवाच्या या पवित्र पर्वावर मापोली गाव हरिनामाच्या गजराने दुमदुमून गेले.
