सेलू (ता. प्रतिनिधी) :
हिंगणी येथे आज, दि. ३ एप्रिल रोजी सकाळी बोर नदीकाठी घडलेल्या एका दुर्दैवी घटनेत ३५ वर्षीय तरुणाचा मृत्यू झाला. नदीकाठी गेलेल्या या तरुणाला अचानक फिट आल्याने तो पाण्यात पडला आणि त्याचा बुडून मृत्यू झाला.
मिळालेल्या माहितीनुसार, हिंगणी येथील रहिवासी दिनेशसिंग गायकी हे सकाळी बोर नदीच्या पात्राजवळ गेले होते. त्यावेळी अचानक त्यांना फिट (अपस्मार) आल्याने त्यांचा स्वतःवरील ताबा सुटला आणि ते पाण्यात कोसळले. पाण्याची खोली अधिक असल्याने आणि त्या अवस्थेत स्वतःला सावरणे शक्य न झाल्याने त्यांचा जागीच मृत्यू झाला.
घटनेची माहिती मिळताच परिसरात मोठी गर्दी झाली. स्थानिक नागरिकांनी तातडीने सेलू पोलिसांना माहिती दिली. पोलिसांनी घटनास्थळी पोहोचून पंचनामा केला असून मृतदेह पाण्याबाहेर काढून उत्तरीय तपासणीसाठी सेलू येथील ग्रामीण रुग्णालयात पाठवण्यात आला आहे.
ही कारवाई ठाणेदार देवेन्द्र ठाकूर यांच्या मार्गदर्शनाखाली सुरू असून पुढील तपास सेलू पोलीस करीत आहेत. या घटनेमुळे हिंगणी परिसरात शोककळा पसरली असून, तरुणाच्या अकाली निधनाने सर्वत्र हळहळ व्यक्त केली जात आहे.
