सेलू (शहर प्रतिनिधी) :
सेलू तालुक्यातील कोलगाव येथे कुंवारा भिवसेन (भिमालपेन) जन्मोत्सवानिमित्त विविध धार्मिक व सांस्कृतिक कार्यक्रमांचे भव्य आयोजन करण्यात आले आहे. दरवर्षीप्रमाणे याही वर्षी हा उत्सव मोठ्या उत्साहात साजरा होत असून परिसरात भक्तीमय वातावरण निर्माण झाले आहे.
उत्सवाच्या प्रारंभी बुधवार, दि. २ एप्रिल २०२६ रोजी मध्यरात्री १२ वाजता तिरमाल भूमकाल वसंतरावजी किरणाके तसेच भूमकाल मुकेश उईके यांच्या हस्ते भिमालपेन व शीतलादेवी यांच्या ज्योती प्रज्वलित करण्यात येणार आहेत. त्यानंतर शनिवार, दि. ३ एप्रिल रोजी सकाळी १० वाजता ध्वजारोहणाचा कार्यक्रम पार पडणार आहे.
उत्सव काळात विविध धार्मिक विधी, भजन, गोंडी नृत्य, समाज मेळावे तसेच पारंपरिक कार्यक्रमांचे आयोजन करण्यात आले आहे. विशेषतः पंचमी निमित्त मोठ्या प्रमाणात भाविकांची उपस्थिती अपेक्षित असून, समाजातील एकात्मता व परंपरा जपण्याचा संदेश या कार्यक्रमातून दिला जाणार आहे.
कार्यक्रमानुसार सकाळी व सायंकाळी नियमित पूजा-अर्चा, भजन-कीर्तन आणि सांस्कृतिक कार्यक्रम सादर केले जाणार आहेत. या उत्सवात सेलू व परिसरातील नागरिकांनी मोठ्या संख्येने सहभागी व्हावे, असे आवाहन आयोजक समितीच्या वतीने करण्यात आले आहे.
हा कार्यक्रम कुंवारा भिवसेन (भिमालपेन) पेनठाणा सेवा समिती, कोलगाव आणि गोंडवाना युवा तत्वसमिती, तालुका सेलू यांच्या संयुक्त विद्यमाने आयोजित करण्यात आला असून, कार्यक्रमाच्या यशस्वीतेसाठी आयोजकांनी “जय सेवा, जय जोहार”चा संदेश देत सर्वांना उपस्थित राहण्याचे आवाहन केले आहे.
