वर्धा :
वर्धावासीयांसाठी आणि या मार्गावरून प्रवास करणाऱ्या प्रवाशांसाठी आनंदाची बातमी असून रेल्वे मंत्रालयाने गाडी क्रमांक १२२८९/१२२९० नागपूर–मुंबई–नागपूर दुरंतो एक्स्प्रेसला वर्धा रेल्वे स्थानकावर थांबा देण्याचा निर्णय घेतला आहे.
मिळालेल्या माहितीनुसार, रेल्वे बोर्डाने यासंदर्भातील अधिकृत आदेश जारी केले असून मध्य रेल्वेच्या प्रस्तावावर विचार करून हा थांबा ‘प्रायोगिक तत्त्वावर’ देण्यात आला आहे. या निर्णयामुळे वर्धा येथून मुंबई किंवा नागपूरकडे प्रवास करणाऱ्या प्रवाशांना मोठा दिलासा मिळणार आहे.
छत्रपती शिवाजी महाराज टर्मिनस–नागपूर दुरंतो एक्स्प्रेस (गाडी क्र. १२२८९/१२२९०) ला वर्धा जंक्शन येथे थांबा देण्यात येणार असून हा निर्णय लवकरच सोयीस्कर तारखेपासून लागू होणार आहे.
इतर गाड्यांनाही थांबा मंजूर :
रेल्वे बोर्डाने याच आदेशात इतर काही महत्त्वाच्या गाड्यांनाही विविध स्थानकांवर थांबा मंजूर केला आहे. यामध्ये यशवंतपूर–हजरत निजामुद्दीन संपर्क क्रांती एक्स्प्रेस (१२६२९/१२६३०) ला शेगाव येथे, यशवंतपूर–चंदीगड एक्स्प्रेस (२२६८५/२२६८६) आणि पुणे–नागपूर एक्स्प्रेस (११२३५/१२१३६) यांना उरुळी येथे थांबा देण्यात आला आहे.
रेल्वे प्रशासनाने या नव्या थांब्यांची व्यापक प्रसिद्धी करण्याचे तसेच तिकिट विक्रीवर लक्ष ठेवण्याचे निर्देश संबंधित विभागांना दिले आहेत. वर्धा स्थानकावर दुरंतो एक्स्प्रेसचा थांबा मिळाल्याने स्थानिक नागरिक आणि लोकप्रतिनिधींकडून समाधान व्यक्त केले जात आहे.
