कोळपेवाडी (प्रतिनिधी) :
कोपरगाव तालुक्यातील कोळपेवाडी पंचक्रोशीत गॅसच्या तीव्र टंचाईमुळे नागरिक हैराण झाले असून महिला-पुरुष आता आंदोलनाच्या तयारीत असल्याचे चित्र दिसत आहे. दि. ४ एप्रिल २०२६ रोजी पहाटेपासूनच बाजारतळावर गॅस सिलिंडरसाठी मोठ्या प्रमाणात गर्दी झाली होती.
सुरेगाव, कोळगाव, थडी आणि कोळपेवाडी परिसरातील शेकडो नागरिक सिलिंडर घेऊन नंबर लावण्यासाठी रांगेत उभे असल्याचे दिसून आले. विशेष म्हणजे डॉक्टर, शिक्षक, इंजिनिअर, सरपंच, ग्रामपंचायत सदस्य यांसारख्या उच्चपदस्थ व्यक्तींनाही गॅससाठी रांगेत उभे राहावे लागत असल्याने ग्रामस्थांमध्ये आश्चर्य व्यक्त होत आहे.
गॅस वितरणाच्या वेळी नंबरवरून मोठमोठे वादही झाल्याचे पाहायला मिळाले. प्रशासनाने यापूर्वीच गॅस टंचाईबाबत तातडीने उपाययोजना करण्याच्या सूचना दिल्या होत्या. तहसीलदार स्तरावर बैठकही घेण्यात आली होती, मात्र प्रत्यक्षात परिस्थितीत कोणताही बदल झालेला दिसत नाही.
कोपरगावमध्ये यापूर्वी झालेल्या आंदोलनानंतर आता कोळपेवाडी पंचक्रोशीतही नागरिक आक्रमक होत असून गॅस टंचाईचा प्रश्न लवकरात लवकर मार्गी न लावल्यास आंदोलन छेडण्याचा इशारा देण्यात येत आहे.
प्रशासनाने तात्काळ लक्ष देऊन गॅस पुरवठा सुरळीत करावा, अशी मागणी कोळपेवाडी, सुरेगाव, कोळगाव व थडी पंचक्रोशीतील नागरिकांकडून जोर धरत आहे.
