लातूर (प्रतिनिधी) : लाचलुचपत प्रतिबंधक विभागाने (एसीबी) उदगीर येथे मोठी सापळा कारवाई करत दोन पोलिस अधिकाऱ्यांना रंगेहाथ पकडले. आरोपींनी गुन्ह्यात अटक टाळण्यासाठी तब्बल ३ लाख रुपयांची लाच मागितल्याचे उघड झाले आहे.
मिळालेल्या माहितीनुसार, तक्रारदाराच्या मेव्हण्याविरुद्ध दाखल असलेल्या गुन्ह्यात अटक न करण्यासाठी तसेच तपासात मदत करण्याच्या बदल्यात आरोपींनी लाच मागितली होती. याबाबत तक्रार प्राप्त झाल्यानंतर लाचलुचपत प्रतिबंधक विभागाने पडताळणी केली असता लाचेची मागणी सत्य असल्याचे निष्पन्न झाले.
दि. २ एप्रिल २०२६ रोजी सापळा रचण्यात आला. यावेळी पोलीस कर्मचारी राहुल बाबूराव नागरगोजे यांनी पंचासमक्ष ४५ हजार रुपयांची लाच स्वीकारली. ही रक्कम त्यांनी पोलिस निरीक्षक राजकुमार पुजारी यांच्या वतीने स्वीकारल्याचे निष्पन्न झाले. लाच स्वीकारल्यानंतर आरोपींनी फोनद्वारे एकमेकांशी संपर्क साधून व्यवहाराची खात्रीही केली.
कारवाईदरम्यान नागरगोजे यांच्याकडून ४५ हजार रुपये व मोबाईल हँडसेट जप्त करण्यात आला, तर पुजारी यांच्या अंगझडतीत मोबाईल हँडसेट मिळून आला आहे. दोन्ही आरोपींना ताब्यात घेण्यात आले असून त्यांच्या घरांची झडती घेण्याची प्रक्रिया सुरू आहे.
या प्रकरणी उदगीर ग्रामीण पोलिस ठाण्यात भ्रष्टाचार प्रतिबंधक कायदा १९८८ अंतर्गत गुन्हा नोंदविण्याची प्रक्रिया सुरू आहे. ही कारवाई पोलीस उपअधीक्षक संतोष बर्गे यांच्या मार्गदर्शनाखाली पार पडली असून पुढील तपास पोलीस निरीक्षक विशाल बहात्तरे करत आहेत.
या घटनेमुळे उदगीर परिसरात खळबळ उडाली असून, लाचखोरीविरोधातील कारवाईमुळे नागरिकांमध्ये समाधान व्यक्त होत आहे.
