धाराशिव (प्रतिनिधी) : सोशल मीडियावर पेट्रोल-डिझेलच्या तुटवड्याबाबत अफवा पसरत असल्याच्या पार्श्वभूमीवर जिल्ह्यात कायदा व सुव्यवस्था अबाधित ठेवण्यासाठी तसेच सार्वजनिक सुरक्षिततेच्या दृष्टीने जिल्हाधिकारी कार्यालयाने महत्त्वाचा आदेश जारी केला आहे. या आदेशानुसार धाराशिव जिल्ह्यात पेट्रोल व डिझेलची खुल्या भांड्यात विक्री करण्यास बंदी घालण्यात आली आहे.
जिल्हाधिकारी कीर्ती किरण पुजार (भा.प्र.से.) यांनी ५ मार्च २०२६ रोजी हा आदेश काढला आहे. आदेशात नमूद केल्याप्रमाणे, पेट्रोल-डिझेल हे ज्वलनशील पदार्थ असल्यामुळे त्याची खुल्या पद्धतीने विक्री केल्यास अपघात होण्याची शक्यता नाकारता येत नाही. त्यामुळे पेट्रोलियम नियम २००२ मधील तरतुदी विचारात घेऊन प्रतिबंधात्मक उपाययोजना करण्यात आल्या आहेत.
प्रशासनाने दिलेल्या सूचनांनुसार, पेट्रोल व डिझेल हे केवळ वाहनांच्या इंधन टाकीतच वितरित करावे. कॅन, बाटली, डबा किंवा इतर कोणत्याही खुल्या भांड्यात इंधन विक्री अथवा पुरवठा करण्यास सक्त मनाई करण्यात आली आहे. तसेच पेट्रोल पंप परिसरात सीसीटीव्ही यंत्रणा कार्यरत ठेवून विक्रीची नोंद ठेवण्याच्या सूचनाही देण्यात आल्या आहेत.
या आदेशाचे उल्लंघन केल्यास पेट्रोलियम नियम २००२ मधील नियम १९८ ते २०२, तसेच भारतीय नागरी सुरक्षा संहिता २०२३ व आपत्ती व्यवस्थापन कायदा २००५ अंतर्गत दंडात्मक व फौजदारी कारवाई करण्यात येणार असल्याचे स्पष्ट करण्यात आले आहे.
दरम्यान, या आदेशाची अंमलबजावणी सुनिश्चित करण्यासाठी संबंधित अधिकाऱ्यांना सूचना देण्यात आल्या आहेत. पेट्रोल-डिझेल तुटवड्याच्या अफवांमुळे अनावश्यक गर्दी होऊ नये आणि कोणतीही दुर्घटना घडू नये, या उद्देशाने हा निर्णय घेण्यात आल्याचे प्रशासनाने स्पष्ट केले आहे.
