शहादा, दि. ०३ (प्रतिनिधी) :
शहादा तालुका स्वस्त धान्य दुकानदार संघटनेच्या तालुकाध्यक्षपदी सामाजिक व राजकीय क्षेत्रातील प्रभावी व्यक्तिमत्व ज्ञानेश्वर भिका चौधरी यांची बिनविरोध निवड करण्यात आली आहे. ही निवड शहादा तहसील कार्यालयात तहसीलदार संभाजीराव पाटील यांच्या प्रमुख उपस्थितीत संपन्न झालेल्या रेशन दुकानदारांच्या विशेष बैठकीत करण्यात आली.
बैठकीच्या प्रारंभी संघटनेचे माजी अध्यक्ष दिवंगत अरविंद कुवर यांना भावपूर्ण श्रद्धांजली अर्पण करण्यात आली. त्यानंतर तालुक्यातील स्वस्त धान्य दुकानदारांच्या विविध प्रश्नांवर सविस्तर चर्चा करण्यात आली. धान्याचा पुरवठा योग्य मोजमापाने मिळावा आणि प्रलंबित कमिशन वेळेत मिळावे, या प्रमुख मागण्यांवर भर देण्यात आला.
यावेळी उपस्थित प्रतिनिधींमध्ये राजू बच्छाव, जगदीश अग्रवाल, रफिक तेली, यशवंत पाटील, लक्ष्मीकांत भावसार, विजय कदम, गजेंद्र चौधरी आदींनी ज्ञानेश्वर चौधरी यांच्या नावाचा प्रस्ताव मांडला. त्यास सर्वानुमते मंजुरी देण्यात येऊन त्यांची अध्यक्षपदी निवड निश्चित करण्यात आली.
नवनिर्वाचित अध्यक्ष ज्ञानेश्वर चौधरी हे विविध सामाजिक व राजकीय संस्थांमध्ये सक्रिय असून, ते तैलीक (चौधरी) समाजाचे अध्यक्ष, जायंट्स ग्रुपचे पदाधिकारी तसेच विविध पतसंस्थांचे संचालक म्हणून कार्यरत आहेत. याशिवाय ते भारतीय जनता पार्टीचे शहराध्यक्ष आणि शहादा नगरपालिकेचे विद्यमान प्रतोद म्हणूनही जबाबदारी सांभाळत आहेत.
“जबाबदारी प्रामाणिकपणे पार पाडू” — ज्ञानेश्वर चौधरी
निवडीनंतर बोलताना त्यांनी सांगितले की, “दुकानदार बांधवांनी माझ्यावर दाखविलेला विश्वास मी पूर्ण करण्याचा प्रयत्न करेन. वितरण व्यवस्थेतील अडचणी दूर करून दुकानदार व लाभार्थ्यांना वेळेवर धान्य मिळावे, यासाठी सातत्याने पाठपुरावा करणार आहे.”
या निवडीबद्दल तालुक्यातील राजकीय, सामाजिक आणि व्यापारी वर्गातून ज्ञानेश्वर चौधरी यांचे अभिनंदन करण्यात येत आहे.
