पुरंदर, दि. (प्रतिनिधी) : खानवडी (ता. पुरंदर) परिसरात बुधवारी (दि. १) रात्री साडेनऊच्या सुमारास घडलेल्या धक्कादायक घटनेत २२ वर्षीय तरुणीचा खून झाल्याची घटना उघडकीस आली आहे. या प्रकरणी सासवड पोलिसांनी संशयित आरोपीस अटक केली आहे.
मृत तरुणीचे नाव नीलम महेंद्र गायकवाड (वय २२, रा. माळशिरस, ता. पुरंदर) असे असून, आरोपी अनिकेत विष्णू जाधव (वय २१, रा. माळशिरस) यास अटक करण्यात आली आहे.
पोलिसांनी दिलेल्या माहितीनुसार, नीलम ही सासवड येथील वाघिरे महाविद्यालयात टीवायबीएचे शिक्षण घेत होती. १ एप्रिल रोजी सकाळी ती नेहमीप्रमाणे महाविद्यालयात गेली होती, मात्र सायंकाळपर्यंत घरी परतली नाही. कुटुंबीयांनी तिच्याशी संपर्क साधण्याचा प्रयत्न केला, मात्र संपर्क होऊ शकला नाही.
रात्री उशिरा पोलिसांकडून माहिती मिळाल्यानंतर कुटुंबीयांनी सासवड ग्रामीण रुग्णालयात धाव घेतली असता, नीलमचा उपचारापूर्वीच मृत्यू झाल्याचे स्पष्ट झाले. या प्रकरणी नीलमचे वडील महेंद्र प्रल्हाद गायकवाड यांनी सासवड पोलिस ठाण्यात तक्रार दाखल केली असून त्यावरून आरोपीविरुद्ध गुन्हा नोंदवण्यात आला आहे.
घटनेनंतर सासवड पोलिसांनी तात्काळ तपासाची चक्रे फिरवत आरोपीस अटक केली आहे. पुढील तपास उपविभागीय पोलिस अधिकारी राजेंद्रसिंह गौर यांच्या मार्गदर्शनाखाली सुरू आहे.
