लातूर, दि. 30 मार्च 2026 (प्रतिनिधी) : जिल्हा आपत्ती व्यवस्थापन प्राधिकरण, जिल्हाधिकारी कार्यालय लातूर व ग्रामसंजीवनी प्रतिष्ठान अहिल्यानगर यांच्या संयुक्त विद्यमाने जिल्हा परिषद केंद्रीय प्राथमिक शाळा, पानचिंचोली येथे आपत्ती व्यवस्थापन प्रशिक्षण कार्यक्रम घेण्यात आला.
या प्रशिक्षणादरम्यान विद्यार्थ्यांना भूकंपासारखी आपत्ती अचानक घडल्यास काय करावे व काय करू नये याबाबत सविस्तर मार्गदर्शन करण्यात आले. तसेच आपत्तीनंतर जखमी व्यक्तींना प्रथमोपचार कसे द्यावे याचे प्रात्यक्षिकही करून दाखवण्यात आले.
पाण्यात बुडालेल्या व्यक्तीला बाहेर काढल्यानंतर कोणती काळजी घ्यावी, तसेच हृदयविकाराच्या झटक्यानंतर सीपीआर (CPR) कसे द्यावे याबाबतही सखोल माहिती देण्यात आली. अचानक उद्भवणाऱ्या आपत्तीच्या वेळी योग्य निर्णय व सुरक्षितता कशी राखावी यावर श्री. राहुल अहिरे यांनी मार्गदर्शन केले.
या कार्यक्रमास श्री. माधव कांबळे (आपत्ती व्यवस्थापन समिती सदस्य), श्री. माधवराव पाटील, ग्रामपंचायत सदस्य श्री. सत्यजीत पाटील, श्री. इकबाल मुजावर, श्री. सिद्धेश्वर कांबळे, पानचिंचोली तलाठी श्री. अमर सुरवसे, श्री. मस्के सर, श्री. होळीकर सर, श्री. धडे सर तसेच शाळेतील सर्व विद्यार्थी उपस्थित होते.
कार्यक्रमाचे स्वागत श्री. मस्के सर यांनी केले तर आभार प्रदर्शन श्री. धडे सर यांनी मानले.
