एरंडोल (प्रतिनिधी) : “आईशिवाय माणूस जीवनाची कल्पनाच करू शकत नाही. तिचं आयुष्यात असणं खूप मोलाचं असून ती प्रत्येक कुटुंबासाठी प्रेरक शक्ती आहे,” असे प्रतिपादन निवृत्त तहसीलदार तथा सूर्योदय ज्येष्ठ नागरिक बहुउद्देशीय संस्थेचे अध्यक्ष अरुण भाऊ माळी यांनी केले. ते ऊर्जा सामाजिक शैक्षणिक संस्थेतर्फे आयोजित ‘आई महोत्सवा’त आदर्श आई गौरव सोहळ्यात अध्यक्षस्थानावरून बोलत होते.
कार्यक्रमास नगरसेवक रवींद्र महाजन, एरंडोल शहर संघर्ष समितीचे उपाध्यक्ष नामदेव पाटील, संचालक गणेश बडगुजर, विविध कार्यकारी सहकारी सोसायटीचे संचालक सुरेश देशमुख तसेच संयोजक प्रवीण महाजन यांची प्रमुख उपस्थिती होती.
यावेळी पतीच्या निधनानंतरही कुटुंबाचा आधार बनून संघर्ष करत कुटुंब पुढे नेणाऱ्या मातांचा ‘आदर्श आई गौरव’ पुरस्कार देऊन सन्मान करण्यात आला. यात बानोबी गुलाब बागवान (८३), शांताबाई निंबा शिंपी (८५), दमयंती लालजी ठक्कर (७८), विमलबाई संतोष महाजन, शशिकला गोकुळदास मानुधने, अप्रुकबाई लक्ष्मण पाटील व अनुसया सुधनवा महाजन यांचा समावेश होता. शाल, सन्मानचिन्ह व पुष्पगुच्छ देऊन या मातांचा सहस्रचंद्रदर्शन सोहळाही साजरा करण्यात आला.
नामदेव पाटील यांनी आपल्या मनोगतात ‘आई महोत्सव’ हा कार्यक्रम प्रेरणादायी असल्याचे सांगत ‘माय’ ही कविता सादर केली. कार्यक्रमाचे प्रास्ताविक व सूत्रसंचालन प्रवीण आधार महाजन यांनी केले, तर आभार ऊर्जा संस्थेच्या अध्यक्षा अंजली महाजन यांनी मानले.
या कार्यक्रमास नीलिमा मानुधने, मीनाक्षी पाटील, यशोदा महाजन, शुभम महाजन, सुनंदा शिंपी, पत्रकार राजू ठक्कर आदी उपस्थित होते. कार्यक्रमाच्या यशस्वीतेसाठी तेजस्विनी महाजन व कल्याणी महाजन यांनी परिश्रम घेतले. तसेच शशिकला मानुधने व यशोदा महाजन यांनी ऊर्जा संस्थेच्या कार्याचे कौतुक केले, तर सूर्योदय ज्येष्ठ नागरिक संस्थेतर्फे अध्यक्ष अरुण भाऊ माळी यांनी अंजली महाजन व प्रवीण महाजन यांचा विशेष गौरव केला.
