येवला (प्रतिनिधी) : येवला तालुक्यातील वाघाळा परिसरात एका मुक्या प्राण्याचा जीव वाचवण्यासाठी गावकऱ्यांनी केलेल्या प्रयत्नांचे सर्वत्र कौतुक होत आहे. एका कुत्र्याच्या डोक्यात प्लॅस्टिकची बरणी अडकून तो तब्बल ५ ते ६ दिवस त्रस्त अवस्थेत फिरत होता.
गावकऱ्यांकडून सतत प्रयत्न सुरू असतानाही बरणी काढण्यात यश येत नव्हते. अखेर वडाची खोरी, अडसूरेगाव शिवारात तरुणांनी एकत्रितपणे धाडसी प्रयत्न करत त्या कुत्र्याला पकडून त्याच्या डोक्यात अडकलेली बरणी सुरक्षितरीत्या काढली आणि त्याचा जीव वाचवला.
या रेस्क्यू मोहिमेत गोरख नवले, बापू सोमासे, रामेश्वर सोमासे, समाधान सोमासे, दत्तू अरुण सोमासे, कैलास सोमासे, रवि सोमासे, सुरेश सोमासे, अमोल सोमासे, वाल्मिक सोमासे तसेच अमोल पाटील नवले यांनी महत्त्वाची भूमिका बजावली.
या धाडसी कार्याबद्दल संबंधित तरुणांचे परिसरात कौतुक होत असून, “मुक्या प्राण्यांप्रती संवेदनशीलता” जपण्याचा संदेश या घटनेतून मिळाला आहे.
